რუსეთის პრეზიდენტი, ვლადიმირ პუტინი ინდოეთში ორდღიანი ვიზიტით ჩავიდა.
პუტინი ინდოეთის პრემიერმინისტრს, ნარენდრა მოდის შეხვდება. ორი ქვეყნის ლიდერები სავარაუდოდ რამდენიმე შეთანხმებას მოაწერენ ხელს. ერთ-ერთი მთავარი განსახილველი თემა ინდოეთის მიერ რუსული ნავთობის შეძენა იქნება.
ოქტომბერში Reuters-მა წყაროებზე დაყრდნობით გაავრცელა ინფორმაცია, რომ ინდოელი ნავთობგადამამუშავებლები რუსული ნავთობის იმპორტის მკვეთრად შემცირებას აპირებენ, რათა რუსეთის ორი უმსხვილესი ნავთობკომპანიის წინააღმდეგ აშშ-ს ახალ სანქციებს დაემორჩილონ.
საკითხთან ახლოს მყოფი წყაროების თქმით, კერძო კომპანია Reliance Industries, რომელიც ინდოეთში რუსული ნავთობის უდიდესი მყიდველია, რუსული ნავთობის იმპორტის შემცირებას ან სრულ შეწყვეტას გეგმავს. ინდური კომპანია რუსულ Rosneft-თან არსებული გრძელვადიანი ხელშეკრულების ფარგლებში შესყიდვების შეჩერებასაც აპირებს.
საკითხთან უშუალო კავშირში მყოფმა წყარომ Reuters-ს განუცხადა, რომ ინდოეთის სახელმწიფო ნავთობგადამამუშავებლები - Indian Oil Corp, Bharat Petroleum Corp და Hindustan Petroleum Corp - ასევე განიხილავენ თავიანთ სავაჭრო დოკუმენტებს რუსეთის ნავთობთან დაკავშირებით, რათა დარწმუნდნენ, რომ სანქცირებული კომპანიებისგან მიწოდება აღარ განხორციელდება.
ცნობისთვის, აშშ-მ რუსეთის უმსხვილეს ნავთობმწარმოებელ კომპანიებს, Rosneft-სა და Lukoil-ს, სანქციები დაუწესა.
Reuters ასევე წერს, რომ მოსკოვის მიერ 2022 წელს უკრაინაში სრულმასშტაბიანი შეჭრის შემდეგ, ინდოეთი რუსული ნავთობის ყველაზე დიდი მყიდველი გახდა.
ინდოეთს აშშ-ს მხრიდან 50%-იანი ტარიფი აქვს დაწესებული - ამ ტარიფების ნახევარი კი რუსული ნავთობის შესყიდვების საპასუხოდ.
