გერმანიის საგარეო საქმეთა მინისტრმა იოჰან ვადეფულმა სლოვაკეთს მოუწოდა, გამოავლინოს უფრო მკაფიო სოლიდარობა იმ ზომებში, რომლებიც მიიღება რუსეთის მიმართ უკრაინის წინააღმდეგ მისი ომის გამო. ეს მოიცავს რუსულ ენერგორესურსებზე უარის თქმასაც, რასაც უკრაინის ყველა პარტნიორმა ერთობლივად უნდა დაუჭიროს მხარი, — განაცხადა გერმანელმა პოლიტიკოსმა ბრატისლავაში სლოვაკეთის საგარეო და ევროპულ საქმეთა მინისტრ იურაი ბლანართან შეხვედრისას.
ბლანარისადმი მიმართვისას, ვადეფულმა მოუწოდა რუსეთის ფედერაციაზე "უფრო დიდი ზეწოლის" განხორციელებისკენ.
"რუსეთი არ ავლენს მშვიდობისთვის მზადყოფნას მაშინ, როდესაც უკრაინამ, პირუკუ, არაერთხელ განაცხადა თავისი მზადყოფნის შესახებ", — განმარტა მან.
გერმანელი მინისტრის თქმით, ევროპისთვის მთავარი საფრთხე რუსეთის პრეზიდენტ ვლადიმირ პუტინის იმპერიალიზმია და "ამაში ეჭვის შეტანა ნიშნავს არა მხოლოდ სოლიდარობის არარსებობას, არამედ უპასუხისმგებლობასაც". ვადეფულმა ხაზგასმით აღნიშნა, რომ ევროკავშირს არ შეუძლია დაუშვას ცალკეული წევრების მიერ გადაწყვეტილებების დაბლოკვა, კერძოდ, სანქციების საკითხში.
