უკრაინის დელეგაცია აშშ-ში გაემგზავრება აშშ-ის პრეზიდენტის სპეციალურ წარმომადგენლებთან, ჯარედ კუშნერთან და სტივ უიტკოფთან მოსალაპარაკებლად, რომელიც 9 და 10 ოქტომბერს გაიმართება. ამის შესახებ ჟურნალისტებს უკრაინის პრეზიდენტმა ვოლოდიმირ ზელენსკიმ განაცხადა, იუწყება სააგენტო УНИАН.
უკრაინულ მხარეს წარმოადგენენ პრეზიდენტის აპარატის ხელმძღვანელი კირილ ბუდანოვი, უკრაინის პრეზიდენტის აპარატის ხელმძღვანელის მოადგილე სერგეი კისლიცა, პარლამენტში ფრაქცია "ხალხის მსახურის" თავმჯდომარე დავით არახამია და უკრაინის საგარეო დაზვერვის სამსახურის თავმჯდომარე რუსტემ უმეროვი. ზელენსკიმ ასევე განაცხადა, რომ მოლაპარაკებებს შესაძლოა, ევროპული მხარეც შეუერთდეს.
როგორც "ამერიკის ხმის" უკრაინული სამსახური ამერიკელ მაღალჩინოსანზე დაყრდნობით წერს, შეხვედრაზე განიხილება ახალი წინადადება, "რომელიც მოიცავს კონფლიქტის ყველა ასპექტს და მიზნად ისახავს ომის დასრულებას".
უკრაინის პრეზიდენტი 8 ოქტომბერს ასევე გამოეხმაურა აშშ-ის სახელმწიფო მდივნის, მარკო რუბიოს სიტყვებს იმის შესახებ, რომ უკრაინაში ომი ჩიხში შევიდა, ხოლო მოლაპარაკებების გზით კონფლიქტის მოგვარების პერსპექტივა, მისი აზრით, არ არსებობს. ამ განცხადებით რუბიო ბერძნულ გაზეთ Kathimerini-სთან ინტერვიუში გამოვიდა.
ზელენსკიმ გააკრიტიკა რუბიოს პოზიცია. "არ შეიძლება ერთი მხრივ რუსებთან მომავლის რაღაც ეკონომიკურ პროექტებზე მორიგება, მეორე მხრივ კი იმის თქმა, რომ რაღაც პოლიტიკურ სიტუაციაში, დიპლომატიურ ჩიხში ვართ და ა.შ. ჩვენ არ ვართ დიპლომატიურ ჩიხში. ჩაუკეტეთ მას მთელი ეკონომიკა. ამოუკერეთ რუსეთს პირი. ნუ კვებავთ მათ თქვენი გაყიდვებით. უბრალოდ დაუწესეთ სანქციები მათ იარაღს", - ციტირებს უკრაინის ლიდერს "Укринформ".
ზელენსკიმ ასევე მოუწოდა აშშ-ს, მისცეს უკრაინას Starlink-ის რუსეთის ტერიტორიაზე გამოყენების უფლება. მისი თქმით, ეს დაეხმარება უკრაინას ცაში "დომინირებაში" და საბოლოო ჯამში, აიძულებს პუტინს, მოლაპარაკების მაგიდასთან დაჯდეს.
უკრაინა სარკისებურად პასუხობს რუსულ დარტყმებს, მათ შორის, მონაცემთა ცენტრებზე, განაცხადა ზელენსკიმ. "მონაცემთა ცენტრები, ყველამ იცით, ისინი ურტყამდნენ და ურტყამენ ჩვენს მონაცემთა ცენტრებს. ჩვენ მათ ვუპასუხეთ. ყველა დეტალის თქმა არ შემიძლია", - ციტირებს მას "РБК-Украина".
ცნობისთვის, უკრაინის შეიარაღებულმა ძალებმა დრონებით დაარტყეს "იანდექსის" მონაცემთა ცენტრს რიაზანის ოლქის ქალაქ სასოვოში 8 ოქტომბრის ღამეს. გაჩნდა ხანძარი, მონაცემთა ცენტრმა მუშაობა სრულად შეაჩერა. არავინ დაშავებულა.
