ვაშინგტონში ჯონ ფ. კენედის სახელობის საშემსრულებლო ხელოვნების ცენტრი (კენედის ცენტრი) სარეკონსტრუქციო და სარემონტო სამუშაოების დაუყოვნებლივ დაწყების მიზნით იხურება. აღნიშნული განცხადება აშშ-ის პრეზიდენტმა დონალდ ტრამპმა საკუთარ სოციალურ ქსელ Truth Social-ში გაავრცელა.
ტრამპის თქმით, კენედის ცენტრის დაუყოვნებლივ დახურვის შესახებ გადაწყვეტილება ამ დაწესებულების სამეურვეო საბჭომ "თითქმის ერთსულოვნად" მიიღო.
"დახურვა დაუყოვნებლივ მოხდება, თუმცა რემონტი და რეკონსტრუქცია, რომლებიც ძალიან ფართომასშტაბიანი და რთული სამუშაოებია, ვერ დაიწყება მანამ, სანამ კოლუმბიის ოლქის საოლქო სასამართლო არ გამოიტანს გადაწყვეტილებას ცენტრის მმართველთა საბჭოს მიერ დამტკიცებულ სახელწოდებასთან დაკავშირებით", — ნათქვამია აშშ-ის პრეზიდენტის პოსტში.
სულ რამდენიმე საათით ადრე, ფედერალურმა საოლქო მოსამართლემ კრისტოფერ კუპერმა კვლავ აკრძალა დონალდ ტრამპის სახელის განთავსება აშშ-ის დედაქალაქის მთავარი თეატრალურ-საკონცერტო კომპლექსის ფასადზე.
"არ შეიძლება მემორიალების დადგმა პრეზიდენტ ტრამპისთვის ან ვინმე სხვისთვის კენედის ცენტრში კონგრესის დამტკიცების გარეშე", — დაასაბუთა მოსამართლემ.
ამასთან, კუპერმა ხაზგასმით აღნიშნა, რომ თავის დროზე აშშ-ის საკანონმდებლო ხელისუფლებამ გადაწყვიტა ცენტრისთვის სახელი "მხოლოდ პრეზიდენტ ჯონ კენედის პატივსაცემად" ეწოდებინა.
