ამერიკული ჰაერსაწინააღმდეგო თავდაცვის სისტემის, Patriot-ის რაკეტების ტექნიკური მომსახურების ცენტრი პოლონეთში აშენდება, განაცხადა ქვეყნის თავდაცვის მინისტრის მოადგილემ, მაგდალენა სობკოვიაკ-ჩარნეცკამ.
"ისტორიული გადაწყვეტილებაა! Patriot-ის სისტემებისთვის განკუთვნილი PAC-3 რაკეტების ტექნიკური მომსახურების ცენტრი პოლონეთში აშენდება!" - დაწერა მან სოციალურ ქსელ X-ში. ამ პროექტის განსახორციელებლად გამართულ კონკურსში ოთხი ქვეყანა მონაწილეობდა: პოლონეთის გარდა - გერმანია, ნიდერლანდები და ნორვეგია, დააზუსტა მინისტრის მოადგილემ.
აქამდე აშშ-ს არ სურდა არც ტექნოლოგიების და არც საკუთარი გამოცდილების გაზიარება, განმარტა სობკოვიაკ-ჩარნეცკამ ტელეარხ TVP Info-ს ეთერში. ის ფაქტი, რომ ასეთი ცენტრი ახლა პოლონეთში აშენდება, მისი აზრით, არის "ჩვენი უსაფრთხოების განმტკიცების და შეერთებული შტატების მხრიდან მხარდაჭერის ნიშანი, ასევე მკაფიო სიგნალი იმისა, რომ NATO და, კერძოდ, აშშ ჩვენს ზურგს უკან დგას".
პოლონელი მინისტრის მოადგილის სიტყვებზე დაყრდნობით, პროექტის ღირებულება დაახლოებით 230 მილიონ ევროს შეადგენს, ხოლო მშენებლობის დასრულება უკვე რამდენიმე თვეშია მოსალოდნელი. გარდა ამისა, ვარშავა იმედოვნებს, რომ ცენტრის შექმნის წყალობით, მომავალში შეძლებს Patriot-ის სისტემებისთვის საკუთარი რაკეტების წარმოების აწყობას, ხაზგასმით აღნიშნა სობკოვიაკ-ჩარნეცკამ.
ამასთანავე, სობკოვიაკ-ჩარნეცკამ დასძინა, რომ პროცესი, რომლის ფარგლებშიც ვარშავა სერვისცენტრის, პერსპექტივაში კი Patriot-ის რაკეტების წარმოების სიმძლავრეების შექმნას ცდილობს, უკრაინის გარშემო არსებულ ვითარებაზე არ არის დამოკიდებული. "ჩემმა თანამოსაუბრეებმა ვაშინგტონში დაადასტურეს, რომ უკრაინასთან მიმართებით ასეთი გადაწყვეტილებაც რომ იქნეს მიღებული, ეს ჩვენს ძალისხმევას არ შეცვლის და პოლონეთისთვის მიცემულ თანხმობას ხაზს არ გადაუსვამს", - თქვა თავდაცვის მინისტრის მოადგილემ.
25 სექტემბერს უკრაინის პრეზიდენტმა ვოლოდიმირ ზელენსკიმ განაცხადა, რომ აშშ-ის პრეზიდენტმა დონალდ ტრამპმა მიიღო საბოლოო გადაწყვეტილება კიევისთვის Patriot-ის რაკეტების წარმოების ლიცენზიების მინიჭების შესახებ. თავის კომენტარში სობკოვიაკ-ჩარნეცკამ გაიხსენა, რომ თეთრი სახლის ლიდერმა ანალოგიური განცხადება უკვე გააკეთა მანამდე ანკარაში გამართულ NATO-ს სამიტზე, თუმცა მოგვიანებით ამასთან დაკავშირებით ეჭვი გამოთქვა.
აგვისტოს ბოლოს პოლონეთის თავდაცვის მინისტრის მოადგილემ, პაველ ზალევსკიმ აღნიშნა, რომ მის ქვეყანას გააჩნია საწარმოო სიმძლავრეები და მზად არის, დაიწყოს თავის ტერიტორიაზე Patriot-ის სისტემებისთვის PAC-3 გადამჭრელი რაკეტების წარმოება, ასევე მზად არის, უკრაინასთან ამ მიმართულებით ითანამშრომლოს. მისი თქმით, პოლონეთმა შესაძლოა, განიხილოს გადამჭრელი რაკეტების უკრაინასთან ერთად ერთობლივი წარმოების საკითხი.
Patriot-ის საზენიტო-სარაკეტო კომპლექსები საკვანძო როლს თამაშობს უკრაინის ქალაქებისა და ინფრასტრუქტურის დაცვაში რუსული ბალისტიკური რაკეტებისგან, რომლებსაც მოსკოვი უკვე თითქმის ხუთი წელია ფართოდ იყენებს უკრაინის წინააღმდეგ მის მიერ გაჩაღებულ ომში. მეორე საპრეზიდენტო ვადით ტრამპის მოსვლის შემდეგ, კიევი Patriot-ის სისტემებისთვის რაკეტების რეგულარულ დეფიციტს განიცდის.
