ნატო-ს გენერალურმა მდივანმა, მარკ რუტემ განაცხადა, რომ უკრაინაში ომი გლობალური კონფლიქტია და დასძინა, რომ მის შედეგს ჩინეთის პრეზიდენტი სი ძინპინი ყურადღებით აკვირდება.
ამის შესახებ მარკ რუტემ ნატო-ს შტაბ-ბინაში უკრაინის საგარეო საქმეთა მინისტრ ანდრეი სიბიგასთან ერთად გამართულ პრესკონფერენციაზე ისაუბრა.
ნატო-ს გენერალურმა მდივანმა დადებითად შეაფასა აშშ-ის ძალისხმევა ცეცხლის შეწყვეტის პროცესში, თუმცა ხაზი გაუსვა, რომ ნებისმიერი სამშვიდობო შეთანხმება უნდა იყოს „მყარი“ მომავალში აგრესიის თავიდან ასაცილებლად.
„მსოფლიო ყველაფერს უყურებს. ეს არ არის რეგიონული ომი, ეს არის გლობალური კონფლიქტი, რადგან რუსეთი თანამშრომლობს ჩრდილოეთ კორეასთან, ჩინეთთან და ირანთან. საბოლოოდ, ამ ომის შედეგს ერთი აუდიტორია აფასებს და ეს არის ჩინეთის კომუნისტური პარტიის პირველი მდივანი, ბატონი სი ძინპინი. ის დააკვირდება ვინ აღმოჩნდება ზევით – რუსეთი თუ დასავლეთი“,- აღნიშნა მარკ რუტემ.
თავის მხრივ, უკრაინის საგარეო საქმეთა მინისტრმა, ანდრეი სიბიგამ განაცხადა, რომ უკრაინა კვლავ მზადაა მშვიდობისთვის და მიიღო აშშ-ის წინადადება 30-დღიანი ცეცხლის შეწყვეტის შესახებ, თუმცა რუსეთი მოლაპარაკებების გაჭიანურებაში დაადანაშაულა.
„უკრაინამ მზადყოფნა გამოხატა მშვიდობის მისაღწევად. ჩვენ პირობების გარეშე მივიღეთ აშშ-ის წინადადება 30-დღიანი დროებითი ცეცხლის შეწყვეტის შესახებ. ეს წინადადება კვლავ მოლაპარაკებების მაგიდაზეა, მაგრამ ვხედავთ, რომ მის მიღების ნაცვლად, პუტინი მოთხოვნებსა და პირობებზე საუბრობს. რუსეთი სერიოზულად უნდა მოეკიდოს მშვიდობას. ამისთვის დროა, გავზარდოთ ზეწოლა მოსკოვზე“,- აღნიშა სიბიგამ.
თარგმანი: პირველი არხი
