ლატვიის პრემიერ-მინისტრ ანდრიუს კულბერგსის მემარჯვენე-კონსერვატიულმა პარტიამ "გაერთიანებული სია" უდიდესი მხარდაჭერა მიიღო ქვეყანაში გამართული საპარლამენტო არჩევნების შედეგად. ხმების 94%-ის დათვლის შემდეგ, "გაერთიანებული სია" ხმების 35,4%-ს აგროვებს, იუწყება რიგის ცენტრალური საარჩევნო კომისიის (ცესკო) ვებგვერდი. არჩევნებზე ამომრჩეველთა აქტივობამ 51,8% შეადგინა.
მემარჯვენე კონსერვატორებს მოსდევს ბიზნესმენ აინარს შლესერსის პოპულისტური პარტია "ლატვია პირველ ადგილზე", რომელიც წინასაარჩევნო კამპანიისას რუსულენოვანი ამომრჩევლის მხარდაჭერის მოპოვებას ცდილობდა. ცესკოს მონაცემებით, მან არჩევნებზე ხმების 13,2% მიიღო.
მესამე ადგილზეა "სუვერენული ხელისუფლება/ახალგაზრდა ლატვიელთა გაერთიანება" (ხმების 11,8%). სეიმში შესაძლოა, კიდევ სამი პარტია მოხვდეს, რომლებმაც ასევე გადალახეს 5-პროცენტიანი ბარიერი — "ეროვნული გაერთიანება" (9,1%), ევროკავშირსა და NATO-სთან უფრო მჭიდრო ინტეგრაციის მომხრე "პროგრესულები" (ხმების 7,4%) და ლიბერალ-კონსერვატიული "ახალი ერთობა" (6,2%).
ამრიგად, მოქმედი მმართველი კოალიციის ოთხი პარტიიდან პარლამენტში მხოლოდ სამი შეიძლება მოხვდეს — "გაერთიანებული სია", "ეროვნული გაერთიანება" და "ახალი ერთობა". როგორც Reuters აღნიშნავს, რთული კოალიციური მოლაპარაკებებია მოსალოდნელი.
არჩევნები რუსეთის მხრიდან შესაძლო აგრესიული ქმედებების შესახებ არსებული შიშების ფონზე მიმდინარეობდა. მანამდე გავრცელდა ინფორმაცია, რომ ლატვიაში არჩევნების უსაფრთხოების დასაცავად გერმანიის ბუნდესვერის გამანადგურებლები გადაისროლეს.
