კონგოს დემოკრატიულ რესპუბლიკაში ებოლას დადასტურებული შემთხვევების რაოდენობამ 10 000-ს გადააჭარბა

დაავადებულთა რაოდენობამ 10 060-ს, ხოლო დაღუპულთა რიცხვმა — 4 887-ს მიაღწია, — განაცხადეს კდრ-ის საზოგადოებრივი ჯანდაცვის ეროვნულ ინსტიტუტში.

ეპიდემიის აფეთქება, რომელიც ბუნდიბუგიოს (Bundibugyo) შტამით არის გამოწვეული, მაისის შუა რიცხვებიდან გრძელდება და ქვეყნის ისტორიაში ყველაზე მასშტაბური და სასიკვდილო გახდა, რადგანაც მან 2018-2020 წლების ეპიდემიას გადააჭარბა.

მთლიანობაში, ეს დაკვირვების ისტორიაში მასშტაბებითა და სიკვდილიანობით მეორე ეპიდემიაა. მხოლოდ 2014-2016 წლებში დაფიქსირდა მეტი მსხვერპლი — მაშინ 28 600-ზე მეტი ადამიანი დაინფიცირდა და 11 000-ზე მეტი დაიღუპა, ძირითადად გვინეაში, ლიბერიასა და სიერა-ლეონეში.

ამასთან, კდრ-ის ჯანდაცვის სამინისტროს მონაცემებით, გავრცელების სისწრაფით ამჟამინდელმა ეპიდემიამ წინას უკვე გაუსწრო.

ამჟამინდელი იშვიათი შტამის საწინააღმდეგოდ არც დამტკიცებული ვაქცინა და არც სპეციფიკური მკურნალობა არ არსებობს. ვითარებას ამძიმებს კდრ-ში მიმდინარე შეიარაღებული კონფლიქტი, გზების ცუდი მდგომარეობა და ხელისუფლების მიმართ უნდობლობისა და დეზინფორმაციის ფონზე ადგილობრივი მცხოვრებლების მხრიდან ძალადობის აფეთქებები.

AP-ის ცნობით, ზოგიერთი სამკურნალო ცენტრი გადატვირთულია, ხოლო მედიცინის მუშაკები ხელფასების დაგვიანების ან გადაუხდელობის გასაპროტესტებლად რეგულარულად იფიცებიან.

რეგისტრირებული სიკვდილიანობის შემთხვევების მინიმუმ ნახევარი იმ პირებზე მოდის, რომლებიც არ ყოფილან ჰოსპიტალიზებული — ეს იმაზე მეტყველებს, რომ ბევრ რაიონში დაავადებულები სიმპტომების შესახებ საერთოდ არ აცხადებენ.

გარდა ამისა, იზრდება ორსულთა სიკვდილიანობა, რომლებიც დაინფიცირებისა და იზოლაციის შიშის გამო საავადმყოფოებს თავს არიდებენ. ეპიდემიის გამოცხადებიდან მალევე ამან რიგ პროვინციებში დედათა სიკვდილიანობის გაორმაგება გამოიწვია.

ვირუსი ადვილად ვრცელდება და შეიძლება, დიდხანს შეუმჩნეველი დარჩეს, ვინაიდან მისი ზოგიერთი სიმპტომი სხვა დაავადებების, მაგალითად მალარიის გამოვლინებებს ჰგავს. ებოლა ინფიცირებული ადამიანების ბიოლოგიურ სითხეებთან უშუალო კონტაქტით გადაეცემა და შეუძლია, მძიმე ჰემორაგიული ციებ-ცხელება გამოიწვიოს.