გერმანიის დასავლეთით, რაინლანდ-პფალცის ფედერალურ მიწაზე მდებარე აიფელის რეგიონში, ამერიკულ ავიაბაზა შპანგდალემთან F-16 ტიპის გამანადგურებელმა კატასტროფა განიცადა. აიფელ-ბიტბურგ-პრიუმის ოლქის წარმომადგენელთა წინასწარი მონაცემებით, ინციდენტის შედეგად ერთი ადამიანი დაშავდა.
აშშ-ის სამხედრო-საჰაერო ძალების განცხადებით, პილოტმა კატაპულტირება წარმატებით მოასწრო, ხოლო შემთხვევის მიზეზები დგინდება. გერმანული საინფორმაციო ტელეარხის, n-tv-ის ცნობით, საგანგებო სიტუაცია სასწავლო-საწვრთნელი ფრენის დროს შეიქმნა და პილოტი გადარჩა. თავის მხრივ, ადგილობრივი გაზეთი Volksfreund მიუთითებს, რომ ინციდენტი მაშინ მოხდა, როდესაც F-16 დასაჯდომად ემზადებოდა.
შემთხვევის ადგილზე მაშველები და სახანძრო სამსახურია მობილიზებული. ამ ეტაპზე უცნობია, რამდენად სერიოზულად არის დაშავებული პილოტი.
