ევროკომისიამ ვენეციის ბიენალესთვის განკუთვნილი 2 მილიონი ევროს ოდენობის გრანტი გააუქმა. გადაწყვეტილების მიზეზი ორგანიზატორების მიერ რუსული პავილიონის აღდგენასთან დაკავშირებული გეგმები გახდა, რაც ევროკავშირის მიერ რუსეთის წინააღმდეგ დაწესებულ პოლიტიკურ და კულტურულ სანქციებს ეწინააღმდეგება.
ევროკომისიის განცხადებით, რუსული პავილიონის აღდგენა და მისთვის სტატუსის დაბრუნება მიუღებელია იმ ფონზე, როდესაც რუსეთი უკრაინაში აგრესიულ ომს აგრძელებს. ევროკავშირის პოზიციით, მსგავსი ნაბიჯი ეწინააღმდეგება ორგანიზაციის ღირებულებებსა და რუსეთის იზოლაციის პოლიტიკას.
2 მილიონი ევრო იყო ბიენალეს ერთ-ერთი მნიშვნელოვანი საგრანტო დაფინანსება, რომელიც კულტურული მემკვიდრეობისა და საერთაშორისო თანამშრომლობის პროექტების მხარდაჭერას ისახავდა მიზნად.
ვენეციის ბიენალეს ადმინისტრაციას აღნიშნულ გადაწყვეტილებაზე ოფიციალური კომენტარი ჯერ არ გაუკეთებია, თუმცა ხელოვნების წრეებში ეს ფაქტი უკვე გახდა მწვავე კამათის საგანი. ნაწილი მხარს უჭერს ევროკომისიის მკაცრ პოზიციას, ნაწილი კი აპელირებს "ხელოვნების თავისუფლებასა" და პოლიტიკისგან მის გამიჯვნაზე.
