რუსეთის პრეზიდენტმა ვლადიმერ პუტინმა აღმოსავლეთ ეკონომიკურ ფორუმზე საუბრისას განაცხადა, რომ უკრაინაში კონფლიქტის მშვიდობიანი მოგვარების შანსები არსებობს.
მისი თქმით, პირველ რიგში, მოლაპარაკებები და შეთანხმება რუსეთსა და უკრაინას შორის უნდა შედგეს, თუმცა ის მიესალმება სხვა ქვეყნების, მათ შორის აშშ-ისა და ჩინეთის, მხარდაჭერასა და წვლილს ამ პროცესში. ამავდროულად, პუტინმა აღნიშნა, რომ ორმხრივ მოლაპარაკებებს ართულებს შავი ზღვის აუზში ტრანსპორტზე განხორციელებული თავდასხმები და უსაფრთხოებასთან დაკავშირებული გამოწვევები. რუსეთის ლიდერმა ასევე დაადასტურა, რომ სპეციალური სამსახურების ხაზით კონტაქტები ამჟამადაც გრძელდება.
თავის მხრივ, უკრაინის პრეზიდენტმა ვოლოდიმირ ზელენსკიმ თავის ყოველდღიურ ვიდეომიმართვაში განაცხადა, რომ კიევი ამერიკული მხარის დელეგაციას ელოდება.
მისი თქმით, უკრაინული მხარე მუდმივ კონტაქტზეა აშშ-ის პრეზიდენტის წარმომადგენლებთან და უკვე არსებობს წინასწარი თარიღები ვიზიტისთვის, რომელიც როგორც კიევში, ისე მოსკოვში იგეგმება. ზელენსკიმ ხაზგასმით აღნიშნა, რომ უსაფრთხოების გარანტიებისა და სამომავლო ნაბიჯების შესამუშავებლად ეს დიპლომატიური კონტაქტები კრიტიკულად მნიშვნელოვანია.
