ამერიკელმა სამხედროებმა დარტყმების მიყენების ახალი გეგმები შეიმუშავეს, რომლებიც ირანის ენერგეტიკულ ინფრასტრუქტურასა და ბირთვულ ობიექტებზე იერიშისთვის, სავარაუდოდ, ე.წ. "ყველა ბომბის დედის" გამოყენებას ითვალისწინებს იმ შემთხვევისთვის, თუ აშშ-ის პრეზიდენტი დონალდ ტრამპი შუალედურ არჩევნებამდე ან მის შემდეგ საბრძოლო მოქმედებების განახლების ბრძანებას გასცემს. ამის შესახებ ტელეკომპანია CNN ვითარებაში გარკვეულ რამდენიმე ამერიკელ ოფიციალურ პირზე დაყრდნობით იტყობინება.
როგორც განმარტავენ, საუბარია GBU-43/B Massive Ordnance Air Blast Bomb (MOAB)-ზე — აშშ-ის არსენალში არსებულ ყველაზე დიდ არაბირთვულ ბომბზე. ირანის წინააღმდეგ ომში მისი გამოყენება მნიშვნელოვან ესკალაციას ნიშნავს, - იტყობინება ტელეკომპანია სამხედრო გეგმებში ამ იარაღის პოტენციურ გამოყენებასთან დაკავშირებულ შიდა განხილვებში ჩახედულ მრავალრიცხოვან წყაროებთან საუბრის საფუძველზე.
"რამდენიმე თვის განმავლობაში ტრამპი და მისი მრჩევლები განიხილავდნენ ვარიანტებს, რომლებიც, სულ მცირე, საინფორმაციო ეფექტის თვალსაზრისით, ომის დასასრული გახდებოდა, რადგან აცნობიერებდნენ, თუ რამდენად არაპოპულარული გახდა ეს კონფლიქტი ამერიკელებში", — იტყობინება CNN.
დონალდ ტრამპმა სამხედროებს უბრძანა, ირანულ სამიზნეებზე დამატებითი დარტყმების გეგმა შეემუშავებინათ, რომლებიც მოიცავს ენერგეტიკული ინფრასტრუქტურის მნიშვნელოვან ნაწილს და ბომბ MOAB-ის პოტენციურ გამოყენებას, განუცხადა CNN-ს ერთ-ერთმა წყარომ.
მეორე თანამოსაუბრემ CNN-ს განუცხადა, რომ ირანის ბირთვულ ობიექტებზე დარტყმების მიყენების სამხედრო გეგმები პირდაპირ ითვალისწინებს ბომბ MOAB-ის გამოყენებას.
კიდევ ერთმა ამერიკელმა ოფიციალურმა პირმა აღნიშნა, რომ დაგეგმვისას სამხედროები პოლიტიკოსებისთვის ვარიანტების მთელ სპექტრს შეიმუშავებენ, ყველაზე მარტივიდან ყველაზე რთულამდე. უფრო რთული სამიზნეებისთვის, მათ შორის, ღრმად მიწისქვეშ განთავსებულებისთვის, უფრო დიდი ბომბებია საჭირო, ხოლო MOAB მათგან ყველაზე დიდია.
თუმცა, იმის შესახებ, იქნება თუ არა ბომბი MOAB ეფექტური საბრძოლო მასალა მიწისქვეშ განთავსებული ირანული ბირთვული ობიექტების წინააღმდეგ, მრავალი ექსპერტი ეჭვს გამოთქვამს. მიუხედავად იმისა, რომ GPS-ით მართვად ამ ბომბს ცხრა საქალაქო კვარტალის ეკვივალენტური ტერიტორიის განადგურება შეუძლია, მას, სავარაუდოდ, არ ეყოფა უნარი, საკმარისად ღრმად შეაღწიოს გრანიტის ფენებით გამაგრებული ზედაპირის ქვეშ, განაცხადეს წყაროებმა.
MOAB-ი აშშ-ის ყველაზე მძლავრი არაბირთვული ბომბია, რომელმაც მიიღო მეტსახელი "ყველა ბომბის დედა" და დაახლოებით 9800 კგ-ს იწონის. ერაყის ომის დროს შემუშავებული MOAB-ი წარმოადგენს მოცულობითი აფეთქების ტიპის საბრძოლო ქობინს, რომელიც მიწაზე დაცემამდე ფეთქდება და ყველა მიმართულებით მძლავრ აფეთქებას იწვევს. 2003 წელს გამოცდის დასკვნით ეტაპზე სამხედრო ოფიციალურმა პირებმა CNN-ს განუცხადეს, რომ MOAB-ი უპირატესად ჩაფიქრებული იყო როგორც იარაღი, რომელიც "ფსიქოლოგიური ოპერაციებისთვის" გამოიყენება.
