აშშ-ის სენატში წარდგენილია ორპარტიული კანონპროექტი, რომელიც ითვალისწინებს რუსეთისთვის ახალი სანქციების დაწესებას, თუ მოსკოვი უკრაინაში საომარი მოქმედებების შეწყვეტაზე უარს განაცხადებს.
რესპუბლიკელი სენატორის ლინდსი გრემის და დემოკრატი სენატორის რიჩარდ ბლუმენტალის მიერ ინიციირებული კანონპროექტის თანახმად, "რუსეთის წინააღმდეგ ახალი სანქციები ამოქმედდება, თუ მოსკოვი უარს განაცხადებს უკრაინაში მყარი მშვიდობის მისაღწევად კეთილსინდისიერ მოლაპარაკებებზე და მშვიდობის დამყარების შემდეგ ისევ მიმართავს უკრაინის სუვერენიტეტის ხელყოფისკენ მიმართულ ქმედებებს, მათ შორის სამხედრო შეჭრას".
აშშ-ის სენატისთვის წარდგენილი კანონპროექტი ითვალისწინებს 500%-იანი გადასახადის დაწესებასაც იმპორტზე იმ ქვეყნებიდან, რომლებიც რუსეთისგან, მათ შორის, ნავთობს, გაზს და ურანს ყიდულობენ.
კანონპროექტს მხარს უჭერს სენატის 100-დან 50 წევრი. მათ შორის არიან როგორც რესპუბლიკური, ისე დემოკრატიული პარტიის წარმომადგენლები.
ამერიკის შეერთებული შტატების პრეზიდენტმა დონალდ ტრამპმა, რომელსაც თავის ერთ-ერთ პრიორიტეტად გამოცხადებული აქვს უკრაინაში ომის დასრულება, გასულ კვირაში არ გამორიცხა, რომ თუ რუსეთი საბრძოლო მოქმედებებს არ შეწყვეტს და მოლაპარაკებაზე უარს განაცხადებს რუსულ ნავთობს მეორად ტარიფებს დაუწესებს.
