ირანის საგარეო საქმეთა მინისტრმა, აბას არაღჩიმ უკრაინის პრეზიდენტი ვოლოდიმირ ზელენსკი ირანულ გემზე მიზანმიმართულ თავდასხმაში დაადანაშაულა. არაღჩის განცხადებით, კიევის ამ ქმედების მთავარი მიზანი მიმდინარე კონფლიქტში ევროპული ქვეყნების უშუალო ჩათრევა და ესკალაციის გაღვივებაა.
"უკრაინის ხელისუფლებისა და პირადად ვოლოდიმირ ზელენსკის მიერ ირანულ გემზე მიზანმიმართული იერიში სხვა არაფერია, თუ არა საშიში პროვოკაცია. ამ ქმედების ერთადერთი მიზანია, მიმდინარე კონფლიქტში ევროპული ქვეყნები ჩაითრიოს და ომის მასშტაბები გააფართოოს. ევროპა ფრთხილად უნდა იყოს, რათა არ აჰყვეს კიევის ამ სახიფათო თამაშს და არ დაუშვას რეგიონში სიტუაციის კიდევ უფრო ესკალაცია," — განაცხადა აბას არაღჩიმ.
საგარეო უწყების ხელმძღვანელის მტკიცებით, უკრაინის მხრიდან ირანულ ხომალდზე მიტანილი იერიში ემსახურება მხოლოდ ერთ მიზანს — ომის გეოგრაფიის გაფართოებას.
თეირანში მიიჩნევენ, რომ უკრაინის ხელისუფლება კრიზისის ახალ ფაზაში გადაყვანას ცდილობს, რათა დასავლელი პარტნიორები აიძულოს, კონფლიქტში პირდაპირ ჩაერთონ.
ირანი მოუწოდებს ევროპულ სახელმწიფოებს, შეინარჩუნონ გონიერება და თავიდან აიცილონ კიევის პროვოკაციაში ჩაბმა.
ირანის ხელისუფლების განცხადება მოჰყვა საერთაშორისო წყლებში მომხდარ ინციდენტს, რომლის დროსაც ირანის დროშის ქვეშ მცურავი გემი თავდასხმის სამიზნე გახდა. თეირანმა მომხდარზე პასუხისმგებლობა უკრაინის შეიარაღებულ ძალებს დააკისრა.
კიევსა და თეირანს შორის დიპლომატიური ურთიერთობები უკიდურესად დაძაბულია. უკრაინა და მისი დასავლელი მოკავშირეები ირანს რუსეთისათვის სამხედრო დახმარების — კერძოდ, "შაჰედის" ტიპის მოიერიშე დრონებისა და ბალისტიკური რაკეტების მიწოდებაში ადანაშაულებენ, რასაც მოსკოვი უკრაინის წინააღმდეგ აქტიურად იყენებს. ირანი ამ ბრალდებებს ოფიციალურად კვლავ უარყოფს.
