უეფას ჩემპიონთა ლიგის საწყისი ფაზის პირველ ტურში მიქაუტაძის „ვილიარეალი“ ლონდონში „ტოტენჰემთან“ დამარცხდა, „ყარაბაღმა“ გასვლაზე „ბენფიკას“ მოუგო

1758057029

უეფას ჩემპიონთა ლიგაზე საწყისი ფაზის პირველი ტური დაიწყო

გიორგი მიქაუტაძის „ვილიარეალი“ პირველ ტურში ლონდონში „ტოტენჰემს“ შეხვდა და 0:1 დამარცხდა.

შეხვედრის მე-4 წუთზე კურიოზული ავტოგოლის ავტორი „ვილიარეალის“ მეკარე ლუის ჟუნიორი გახდა.

გიორგი მიქაუტაძე (Flashscore - 6,3) პირველიდან ბოლო წუთამდე იყო მინდორზე.

„ტოტენჰემი“ - „ვილიარეალი“ 1:0(1:0)
გოლი: 4' ლუის ჟუნიორი, საკუთარ კარში

სენსაციურად მოიგო პირველი ტურის შეხვედრა აღდამის „ყარაბაღმა“. აზერბაიჯანულმა კლუბმა გასვლაზე სახელგანთქმული „ბენფიკას“ მიერ მათ კარში უკვე მე-16 წუთისთვის გატანილ ორ გოლს სამით უპასუხა.

„ბენფიკა“ - „ყარაბაღი" 2:3(2:1)
გოლები: 4' ენცო ბარენეჩეა 1:0, 16' ვანგელის პავლიდისი 2:0, 30' ლეანდრუ ანდრადე 2:1, 48' კამილო დურანი 2:2, 86' ალექსეი კაშჩუკი 2:3

მადრიდის „რეალმა“ „მარსელთან“ შეხვედრაში 22-ე წუთზე გაუშვა გოლი, 29-ე წუზე კილიან მბაპეს დარტყმული თერთმეტმეტრიანით გაათანაბრა და შემდეგ დიდხანს უშედეგოდ უტევდა.

73-ე წუთზე მსაჯი სტუმართა მეკარის მიერ მადრიდელთა კაპიტან დანიელ კარვახალთან შეჯახების მეტად პროვოკაციულ გაფორმებას წამოეგო, მადრიდელები ათნი დარჩნენ და „მარსელს“ შეხვედრის მოგების შანსი მიეცა, მაგრამ 79-ე წუთზე მათ კარში თერთმეტმეტრიანი დაინიშნა და კილიან მბაპემ მეორედ შეარხია სტუმართა კარის ბადე.

„რეალი“ - „მარსელი“ 2:1(1:1)
გოლები: 22' ტიმოთი ვეა 0:1, 29' და 81' კილიან მბაპე, ორივე თერთმეტმეტრიანიდან 1:1 და 2:1
გაძევება: 72' დანიელ კარვახალი (წითელი ბარათი)

ტურინში შეხვედრის 86-ე წუთზე სტუმრებმა „იუვენტუსის“ კარში მეოთხე ბურთი გაიტანეს და მოგებასთან ერთ ნაბიჯში იყვნენ, თუმცა კომპენსირებული დროის მე-4 და მე-6 წუთებზე უკვე მასპინძლებმა შეაგდეს ორი ბურთი დორტმუნდის „ბორუსიას“ კარში და უხვგოლიანი ფრე დააფიქსირეს.

„იუვენტუსი“ - „ბორუსია“ დორტმუნდი 4:4(0:0)
გოლები: 53' კარიმ ადეიემი 0:1, 64' კენან ილდიზი 1:1, 65' ფელიქს ნმეჩა 1:2, 67' დუშან ვლაჰოვიჩი 2:2, 74' იან კოუტო 2;3, 86' რამი ბენსებაინი თერთმეტრმეტრიანიდან 2:4, 90+4' დუშან ვლაჰოვიჩი 3:4, 90+6' ლოიდ კელი 4:4