კონფერენც ლიგის საკვალიფიკაციო ეტაპის მესამე რაუნდის საპასუხო შეხვედრაში, რომელიც უნგრეთის ქალაქ დებრეცენში გაიმართა, „მაკაბი“ (ხაიფა, ისრაელი „რაკოვს“ (ჩესტოხოვა, პოლონეთი) მასპინძლობდა.

ისრაელის და პოლონეთის გუნდებს შორის ურთიერთობა ერთი კვირის წინ ჩესტოხოვაში გამართული პირველი შეხვედრის დროს დაიძაბა. მატჩის დროს „რაკოვის“ გულშემატკივრებმა ტრიბუნაზე ღაზის სექტორში არსებული ვითარების ამსახველი ბანერი გამოფინეს. თეთრ ტილოზე აშკარად ჩანდა სლოგანი: „ისრაელი კლავს, მაგრამ მსოფლიო დუმს“.

მატჩის სტუმართა მოგებით დასრულდა, თუმცა, ამის მიუხედავად, მათ გასახდელი საშინელ მდგომარეობაში დატოვეს და როგორც პოლონური პრესა წერდა, ძნელი სათქმელი იყო, ასე სტუმრებმა გულშემატკივრების მიერ გამოფენილი ბანერის გამო გამოხატეს აღშფოთება თუ უბრალოდ ეტიკეტის ელემენტარული ნორმები უგულებელყვეს.

საპასუხო შეხვედრის წინა დღეს ფეხბურთელებს შორის დაპირისპირება ვარჯიშის დროს მოხდა, როცა ებრაელმა ფეხბურთელებმა  ვარჯიში დაასრულა, მაგრამ მინდვრის დატოვება არ იჩქარეს და პოლონელებს ვარჯიშის დაწყებაში შეუშალეს ხელი.


უშუალოდ მატჩის დროს „მაკაბის“ გულშემატკივრებმა ტრიბუნაზე გამოფინეს ბანერი, რომელზედაც ეწერა: „მკვლელები 1939 წლიდან“.


სკანდალურ ბანერს პოლონელთა აღშფოთებული გამოხმაურება მოჰყვა. პრეზიდენტმა კაროლ ნავროცკიმ სოციალურ ქსელში დაწერა: „ხაიფის „მაკაბის“ გულშემატკივრების მიერ გამოფენილი სკანდალური ბანერი მეორე მსოფლიო ომის მსხვერპლი პოლონეთის მოქალაქეების, მათ შორის 3 მილიონი ებრაელის ხსოვნას შეურაცხყოფს. ეს უბრალოდ ენით აღუწერელი სისულელეა“.


შეხვედრა პოლონელებმა 2:0 მოიგეს. ორი მატჩის ჯამში მათ ასევე გაიმარჯვეს და შემდგომ ეტაპზე გავიდნენ.