კომპანია ჩვენთან თანამშრომლობს. ბაზრიდან მყისიერად დაიწყო პროდუქციის გამოთხოვა, თუმცა ჩვენ ამით არ დავკმაყოფილდით და დამატებით კიდევ გავაკეთეთ ორი რამ. ჩვენ კომპანია „მილა“ შევამოწმეთ, რომელიც სასკოლო დაწესებულებებისა და ბაგა-ბაღების მიმწოდებელია, - განაცხადა „სოფლის ნობათის“ რძის ნიმუშებში აღმოჩენილ დარღვევაზე საუბრისას სურსათის ეროვნული სააგენტოს ხელმძღვანელმა, ზურაბ ჩეკურაშვილმა „დღის ქრონიკაში“ ჩართვისას.
სააგენტოს ხელმძღვანელმა ისაუბრა, რამდენად ხშირად მოწმდება რძის მწარმოებელი კომპანიები სააგენტოს მიერ. მისივე თქმით, სააგენტოს თანამშრომლები სახელმწიფო პროგრამის ფარგლებში შევიდნენ „სოფლის ნობათის“ შესამოწმებლად.
ჩეკურაშვილმა აღნიშნა ,რომ სააგენტო რძის გადამამუშავებელ კომპანიებს წელიწადში სულ მცირე 4-ჯერ ამოწმებს. შედეგად, რძის მწარმოებელი ბიზნესს-სექტორი გასულ წელს სააგენტომ დაახლოებით, 1 500-ჯერ შეამოწმა, საიდანაც 1031 ნიმუში იყო აღებული. ამასთან, რაც შეეხება „სოფლის ნობათს“, გასულ წელს 15-ჯერ შემოწმდა. შემოწმება მოხდა კონტროლის სხვადასხვა სახით, კერძოდ, დოკუმენტური შემოწმების სახით, ნიმუშების აღებით, ასევე ჰასპის (HACCP) აუდიტით.
„ამ შემთხვევაში, ამ კომპანიას აქვს უმაღლესი სტანდარტი დანერგილი, რომელიც არის „აისო“, რომელსაც ასევე ვამოწმებთ. ეს არის ჩვეულებრივი პრაქტიკა. ამ სტანდარტმა არსებული დარღვევა ვერ გამორიცხა, რადგან ალბათ, თავადაც არ მოელოდნენ, იმდენად დაზღვეული ეგონათ თავი, მაგრამ ასეთი შემთხვევები ხდება მსოფლიო მასშტაბით“, - განაცხადა ჩეკურაშვილმა.
მისივე თქმით, შემოწმების შედეგად მცირე პარტიაში აღმოჩნდა კანონით დასაშვები, ზღვრული ოდენობის გადამეტება და შედეგად, სააგენტომ ევროპული სტანდარტის შესაბამისად იმოქმედა.
„კომპანია გვეთანამშრომლება. ბაზრიდან მყისიერად დაიწყო პროდუქციის გამოთხოვა, თუმცა ჩვენ ამით არ დავკმაყოფილდით და დამატებით კიდევ გავაკეთეთ ორი რამ. ჩვენ კომპანია „მილა“ შევამოწმეთ, რომელიც სასკოლო დაწესებულებებისა და ბაგა-ბაღების მიმწოდებელია და ახლა იქ ყველაფერი წესრიგშია. არანაირი საშიშროება იქ არ არის. ასევე, დღეს დილიდან დამატებით, მთელი საქართველოს მასშტაბით. თბილისის საქალაქო სამსახურსა და რეგიონულ სამსახურებს დავავალეთ სავაჭრო ქსელების კიდევ ერთხელ შემოწმება, რათა დარწმუნებული ვყოფილიყავით, რომ ამ პარტიის ნაწარმი - „სოფლის ნობათი“ თაროებიდან მოხსნილია და გაყიდვაში არ არის“, - განაცხადა ჩეკურაშვილმა.
მისივე თქმით, საქართველოს არც ერთ დასახლებულ პუნქტში აღნიშნული პროდუქცია აღარ იყიდება.
სურსათის ეროვნულმა სააგენტომ გაავრცელა ინფორმაცია, რომ „სოფლის ნობათის“ რძის ნიმუშებში გამოვლინდა აფლატოქსინი და მოუწოდა მომხმარებლებს, არ გამოიყენონ აღნიშნული რძე. სურსათის ეროვნული სააგენტოს ცნობით, „სოფლის ნობათის“ იმპორტირებული რძის ხუთი ნიმუშის ბაზრიდან ამოღება და დალუქვა დაიწყო.
