საქართველოს ეროვნულმა ბანკმა ღვინისა და სხვა ალკოჰოლური სასმელების სექტორის კვლევის პრეზენტაცია გამართა

მათივე ცნობით, კვლევა საქართველოში ღვინისა და სხვა ალკოჰოლური სასმელების ბაზრის მიმოხილვას, სექტორის საკრედიტო პორტფელის ანალიზსა და ალკოჰოლური სასმელების წარმოების ფინანსურ მაჩვენებლებს მოიცავს.

ღონისძიება სიტყვით გახსნა საქართველოს ეროვნული ბანკის პრეზიდენტმა, ნათია თურნავამ.

ნათია თურნავას თქმით, ალკოჰოლური სასმელების სექტორი ერთ-ერთი მნიშვნელოვანი საექსპორტო მიმართულება და ფინანსური კონტრიბუტორია ქვეყნის ეკონომიკაში. მისივე განცხადებით, აღნიშნული საკითხების განხილვა მნიშვნელოვანია როგორც საფინანსო ინსტიტუტებისთვის პროექტების გადახდისუნარიანობის შეფასებისას და მათ დაკრედიტებაზე გადაწყვეტილების მიღების პროცესში, ასევე სექტორში მოქმედი კომპანიებისა და პოლიტიკის გამტარებლებისთვის.

„ღვინის სამშობლოში ღვინისა და სხვა ალკოჰოლური სასმელების სექტორი არის სტრატეგიული თავისი მნიშვნელოვნებიდან და ამავდროულად, სიმბოლური დატვირთვიდან გამომდინარე. ამასთან, აღნიშნულ სექტორს მნიშვნელოვანი როლი აქვს ქვეყნის ფინანსურ სტაბილურობაში. მიუხედავად გამოწვევებისა, სექტორი აგრძელებს სტაბილურად ზრდას და ინარჩუნებს კონკურენტულ პოზიციას ძირითად საექსპორტო ბაზრებზე. სიღრმისეული სექტორული ანალიზი მნიშვნელოვანია სექტორში არსებული ტენდენციებისა და გამოწვევების დროული იდენტიფიცირებისა და საპასუხო ღონისძიებების შესამუშავებლად“, – აღნიშნა ნათია თურნავამ.

ამასთან, ღვინის ეროვნული სააგენტოს თავმჯდომარის, ლევან მეხუზლას განცხადებით, ეროვნული ბანკის კვლევა კიდევ ერთი აღიარებაა, რომ მევენახეობა-მეღვინეობის დარგი ძალიან მნიშვნელოვანია საქართველოს ეკონომიკისთვის.

მისივე თქმით, ბოლო ათწლეულის განმავლობაში დარგი სახელმწიფოს მხარდაჭერით  კარგად ვითარდება, სექტორი საგრძნობლად გაიზარდა და ამგვარი კვლევა ძალიან მნიშვნელოვანია.

„ვფიქრობ, ეს კვლევა, რომელიც ღვინისა და ალკოჰოლური სასმელების გლობალურ ბაზარზე არსებულ ტენდენციებსა და რეალობის ანალიზს გვთავაზობს, კარგი დამხმარე იქნება როგორც ჩვენთვის, პოლიტიკის გამტარებლებისთვის, ასევე კერძო სექტორისთვის და საბანკო სექტორისთვის, რომლის გარეშეც ამ დარგის შემდგომი წინსვლა, განვითარება წარმოუდგენელია“, – განაცხადა ლევან მეხუზლამ.

საქართველოს ეროვნული ბანკის მიერ მომზადებული კვლევის თანახმად, 2024 დეკემბრის მდგომარეობით, ალკოჰოლური სასმელების სექტორის პორტფელი 1.4 მილიარდი ლარია, საიდანაც დაახლოებით 50% ლარშია დენომინირებული.

„აღნიშნული პორტფელი მთლიანი ბიზნესსექტორის პორტფელის 4%-მდეა. ინდუსტრია სტაბილურად მზარდია და ინარჩუნებს კონკურენტუნარიანობას საექსპორტო ბაზრებზე. ნიშანდობლივია, რომ ვენახების ფართობები და ღვინის მოხმარება გლობალურად მცირდება, საქართველოში კი ვენახების ფართობები და ღვინის წარმოება მზარდია. აღსანიშნავია ისიც, რომ ალკოჰოლური სასმელების პორტფელის 31% დაფინანსებულია სახელმწიფოს სხვადასხვა პროგრამების ფარგლებში, საიდანაც 87% პროცენტის სუბსიდირებაზე მოდის“, – ნათქვამია საქართველოს ეროვნული ბანკის ინფორმაციაში.

ეროვნული ბანკის ინფორმაციით, შეხვედრა კითხვა-პასუხის რეჟიმში გაგრძელდა. მათივე ცნობით, დაინტერესებულმა მხარეებმა იმსჯელეს კვლევის შედეგებზე, ასევე სექტორის საჭიროებებსა და არსებულ გამოწვევებზე.