„დონალდ ტრამპის მიერ გაკეთებული განცხადებები სრულ თანხვედრაშია საქართველოს ხელისუფლების ქმედებებთან. უფრო მეტიც, ამართლებს „ოცნების“ პოლიტიკას,“ - წერს სოციალურ ქსელში პარტია „ხალხის ძალის“ წევრი თამარ ჩიბურდანიძე.
„გუშინ, დონალდ ტრამპის მიმართვიდან ბევრი საინტერესო გზავნილი მოვისმინეთ, თუმცა, ალბათ ყველაზე საინტერესო იყო განცხადება იმის შესახებ, რომ დემოკრატიის სამშობლოში მისი გაპრეზიდენტებით “დემოკრატია და თავისუფლება ბრუნდება”. ე.ი ბაიდენის მმართველობის დროს ეს ყველაფერი არ არსებობდა.
არადა, სწორედ ბაიდენის ადმინისტრაცია ადანაშაულებდა „ოცნების“ ხელისუფლებას დემოკრატიის უკუსვლაში. სწორედ ისინი აცხადებდნენ, რომ საქართველოში თავისუფლება აღარ არსებობდა. როდესაც ტრამპის მსგავსად, ჩვენც მათ ვაკრიტიკებდით, რუსეთუმეებს და ანტიმედასავლეთეებს გვიწოდებდნენ. უფრო მეტიც, ამ ბრალდებით ქვეყანაში რევოლუციას გვიწყობდნენ და რეზოლუციას რეზოლუციაზე გვიცხობდნენ. მათგან მართული ევროპა კი მათ სიტყვებს პლაგიატივით იმეორებდა.
რა მოხდება ამიერიდან და როგორ გადაიტვირთება საქართველო-ამერიკის ურთიერთობები, ამას მომავალი გვიჩვენებს, თუმცა, მთავარი უკვე მოხდა - დონალდ ტრამპის მიერ გაკეთებული განცხადებები სრულ თანხვედრაშია საქართველოს ხელისუფლების ქმედებებთან. უფრო მეტიც, ამართლებს „ოცნების“ პოლიტიკას. სწორედ ამიტომ ვიმედოვნებთ, რომ ჩვენი პარტნიორობა ახალ ეტაპზე სუვერენული თანამშრომლობით და ორმხრივი ინტერესების დაცვით დაიწყება,“ - წერს თამარ ჩიბურდანიძე
