კონსტრუქცია თქვენი წარმოდგენით არის კარავი და თქვენ გეშინიათ კარვის, გელანდებათ „ვარდების რევოლუციიდან“ „კარვების რევოლუციამდე“. ელოდებით „კარვების რევოლუციას“ და სასაცილოა. გეშინიათ იმის გამო, რომ ძალიან ბევრი დანაშაული და ცოდვა გაქვთ ჩადენილი, - ასე მიმართა "ევროოპტიმისტების" დეპუტატმა რომან გოცირიძემ ხელისუფლებას პარლამენტის პლენარულ სხდომაზე, სადაც სადაც „შეკრებებისა და მანიფესტაციების შესახებ“ კანონში დაგეგმილი ცვლილებების პროექტის განხილვა მიმდინარეობს.
მისივე განმარტებით, ყველა, ვისაც აქამდე კარავი ჩამოართვეს, კომპენსაციისთვის სასამართლოში იჩივლებს.
„თქვენი საფირმო ნიშანი იყო რკინის კონსტრუქცია, რომელსაც ერქვა საკანი და სამი თვის განმავლობაში პარალიზება გაუკეთეთ თბილისს და ვაჭრობა და ტურისტული შემოსავლები გაანულეთ. ბოდიშის მოხდას აპირებთ თუ არა, რომ თურმე ის კონსტრუქციები რაც იყო, იყო უკანონო?!
11 წლის განმავლობაში ყაჩაღებივით თავს ესხმოდით იმ ადამიანებს, რომლებსაც ეს კონსტრუქცია ჰქონდათ. კონსტრუქცია თქვენი წარმოდგენით არის კარავი და თქვენ გეშინიათ კარვის, გელანდებათ „ვარდების რევოლუციიდან“ „კარვების რევოლუციამდე“. ელოდებით „კარვების რევოლუციას“ და სასაცილოა, გეშინიათ იმის გამო, რომ ძალიან ბევრი დანაშაული და ცოდვა გაქვთ ჩადენილი.
ამდენი კარავი რომ წაართვით 11 წლის განმავლობაში, დაუბრუნებთ თუ არა ჯარიმით, ან პროცენტით?! ანუ რაც კანონდარღვევით გქონდათ ჩადენილი, მისი კომპენსაცია მოხდება თუ არა. ყველა გიჩივლებთ სასამართლოში და ყველაფერი არის აღწერილი ტელევიზიებში, როგორ მიათრევდით კარვებს და წვავდით. მოგიწევთ ფულის გადახდა, ოღონდ სახლიდან უნდა მოიტანოთ ფული და სამწუხაროდ, ისევ ბიუჯეტიდან იქნება გადასახდელი.
სცენა არის კონსტრუქცია? ან დროშა არის თუ არა კონსტრუქცია? ხომ შეიძლება თქვათ, რომ საკმაოდ გრძელტარიანი დროშა შეიძლება მომიტინგემ ვიღაცას მოუქნიოს და სამართლიანად ჩაარტყას თავში, ოღონდ არ გააკეთებს ამას, თორემ თქვენ რომ იქ გახვიდეთ, მართლა დროშა მოგხვდებათ თავში. რა არის კონსტრუქცია საბოლოო ჯამში, რომ განგვიმარტოთ“, - განაცხადა რომან გოცირიძემ.
შეგახსენებთ: პარლამენტი კანონპროექტს დაჩქარებული წესით განიხილავს.
კანონპროექტით, შეკრების ან მანიფესტაციის მონაწილეებს ეკრძალებათ, მოაწყონ დროებითი კონსტრუქცია, თუ მისი მოწყობა: საფრთხეს უქმნის შეკრების ან მანიფესტაციის მონაწილეებს ან სხვა პირებს; ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას; იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას; შეკრების ან მანიფესტაციის ჩატარებას არ უკავშირდება. როგორც აღინიშნა, შეკრებისა და გამოხატვის თავისუფლების საკითხის მოწესრიგების მიზნით, სათანადო გადაწყვეტილებას შესაბამისი ორგანო თითოეულ შემთხვევასთან მიმართებით ინდივიდუალურად, ყველა გარემოების გათვალისწინებით მიიღებს. კანონპროექტის ინიციატორები განმარტავენ, რომ ამ ორგანოს მიერ მიღებული გადაწყვეტილება მისი სასამართლოში გასაჩივრების გზით სასამართლო კონტროლს დაექვემდებარება.
