ბექა ოდიშარია: სტიქიის პირველივე წუთებიდან სოციალურ ქსელებში ცრუ გვერდები შეიქმნა, ლიდერების სახელით ტყუილი კომენტარები ვრცელდება

„დაღუპულთა ოჯახებს სამძიმარს ვუცხადებ, მთელი ქართული საზოგადოების მწუხარებას ვიზიარებ. სურათი ნათელია და საზოგადოება ადვილად განსჯის, ვინ მართლა გულშემატკივრობს და განიცდის, ვინ მართლა არის ჭირისუფლის მოზიარე და ვინ თავისი ბინძური პოლიტიკური დღის წესრიგით ახერხებს და აგრძელებს ცხოვრებას ასეთ მძიმე ვითარებაში. ისეთი მძიმე სიტუაციაა, შეიძლება, ადამიანს მართლა ენა გადაეყლაპოს და სიტყვა ვერ იპოვოს. ისეთი განცდებია, როგორსაც მტერსაც კი არ ვუსურვებ. პირველივე წუთებიდან ჩვენი მაშველები, პოლიციელები, ჯარი, მთავრობა, პარტიის ხელმძღვანელობა, პარლამენტი, ქართული საზოგადოება დარაზმული როცა იყო და ერთიანი ძალებით უტევდნენ ამ გამოწვევას, ამ დროს ადამიანებმა მოახერხეს და ჩემ მიერ ჩამოთვლილი ადამიანების მიმართ სიძულვილის შემცველი ცრუ ინფორმაციები გაავრცელეს.

თან როგორი ბინძური ხერხებით? – სოციალურ ქსელებში ცრუ გვერდები შეიქმნა, სადაც ლიდერების სახელით ტყუილი კომენტარები ვრცელდება და ამას მოფიქრება ხომ უნდა? – მგონი, კახა კალაძის მიმართ უზნეობა ყველა ზღვარს გავიდა. მადლობა ღმერთს, რომ ტყუილს მოკლე ფეხები აქვს და ქართველმა ხალხმა ნახა, კალაძის ოჯახმა საკუთარი ტრანსპორტით გაცილებით ადრე როგორ დატოვა ტერიტორია. საზოგადოება ძალიან მალე დარწმუნდება, რომ კობახიძისა და ღარიბაშვილის მიმართ გავრცელებულია ბინძური ტყუილები ბინძური ადამიანების თავშია მოსული. 1984 წელს სწორედ ამ კოტეჯებში მამაჩემთან ერთად ვისვენებდი. ეს კოტეჯები აშენებულია 60-იან წლებში და ამ თვალსაზრისით, კითხვები ვერ იარსებებს. კოტეჯების თემა ნათლად გვანიშნებს, რომ მაშინდელმა მეცნიერებმაც კი გასული ასი წლის გამოცდილებას გადახედეს, ხეობას კალაპოტი უცვალეს და კოტეჯები განალაგეს. ეს მეტყველებს, რომ ამ ხეობაში ასეთი ტიპის სტიქია არ მომხდარა და არც არავინ ელოდებოდა. რაც კი ადამიანის გონებას და ხელს შეიძლება ჰქონოდა ხელმისაწვდომი, ხელისუფლებამ ზედმიწევნით შეასრულა“, – განაცხადა ბექა ოდიშარიამ.