არაფერი ახალი, სინამდვილეში ეს არის ძველი „ნაციონალური მოძრაობის“ დესანტი პოლიტიკაში, – ამის შესახებ „ქართული ოცნების“ წევრმა, არჩილ თალაკვაძემ ნიკა მელიასა და ნიკა გვარამის პარტია „ახალში“ გაერთიანების შესახებ განაცხადა.
„ჩვენ ადრე, წინა თვეებში ვამბობდით, რომ იქნება მცდელობები, საზოგადოება როგორმე დააბნიონ ახალი „ნაციონალური მოძრაობის“ ჩამოყალიბებით. სინამდვილეში ეს არის ისევ იგივე ხალხი, ისევ იმავე პოლიტიკური ბიოგრაფიებით. ძალიან კარგად იცის ჩვენმა საზოგადოებამ, თუ როგორი მეთოდებით მართავდნენ ისინი ქვეყანას, როგორ ექცეოდნენ ადამიანებს. ძალიან კარგად იცის ჩვენმა ხალხმა, რომ თუ ეს ხალხი ოდესმე ხელისუფლებაში იქნება დაშვებული, როგორ გამოიყენებენ ძალაუფლებას. ამიტომ არავითარი შანსები, რა თქმა უნდა, ამ პროექტს, რომ ეს თითქოს სხვა არის, თითქოს ახალი არის, არ აქვს.
ეს არის ამომრჩევლის მოტყუების მცდელობა. როდესაც ძველმა „ნაციონალურმა მოძრაობამ“ განიცადა კრახი პოლიტიკაში, წააგო ცხრა არჩევნები, მისი ლობისტები დარწმუნდნენ, რომ ამ პარტიით, ამ პლატფორმით, ამ სათაურით რაიმე წარმატებაზე საუბარი ზედმეტია. ამიტომ დაიწყეს ახალი „ნაციონალური მოძრაობის“, ახალი პოლიტიკური ჯგუფების ჩამოყალიბება. მაგრამ აქ აქვთ ერთი სერიოზული პრობლემა – რაც არ უნდა ახალი სათაურები დაარქვან, აქვთ ადამიანური რესურსის პრობლემა, ჰყავთ ძველი ადამიანები იმ ძველი ბიოგრაფიებით, ღირებულებებით, როგორიც ჰქონდათ ხელისუფლებაში ყოფნის დროს" - განაცხადა არჩილ თალაკვაძემ.
