შვედეთი უკრაინას 7 მილიარდი დოლარის სამხედრო დახმარებას გაუწევს.
სამხედრო დახმარების დამატებითი პაკეტი სამწლიან გეგმას ითვალისწინებს. უკრაინას გადაეცემა სამხედრო ტექნიკა და გაეწევა ფინანსური დახმარება ტექნიკისა და საბრძოლო მასალის შესაძენად.
”უკრაინისადმი შვედეთის მხარდაჭერის გასაძლიერებლად და გრძელვადიანი პერსპექტივების გასაუმჯობესებლად, მთავრობა და შვედეთის დემოკრატები შეთანხმდნენ უკრაინის სამხედრო დახმარების ჩარჩოზე 2024 წლიდან 2026 წლამდე”, - განაცხადა მთავრობამ 22 მაისს.
თანხა თანაბრად გაიყოფა სამი წლის განმავლობაში. წინასწარ შეთანხმებული პაკეტის გათვალისწინებით, კიევისთვის შვედეთის სამხედრო დახმარების ჯამური მოცულობა 100 მილიარდ შვედურ კრონზე მეტი იქნება.
მთავრობის განცხადებაში აღნიშნულია, რომ სამხედრო მხარდაჭერა შეიძლება მოიცავდეს უკრაინისთვის სამხედრო ტექნიკის უსასყიდლო გადაცემას, თანხების გადაცემას და სამხედრო ტექნიკის შესაძენად ფინანსური დახმარების გაწევას.
