აშშ-ის სენატის საგარეო ურთიერთობათა კომიტეტის წევრების ჯინ შაჰინისა და ჯიმ რიშის განცხადებით, "ქართველი ხალხის აქტის" მხარდამჭერებს 10 სენატორი უერთდება.
მათი ინფორმაციით, ამერიკელმა სენატორებმა : ტომ ტილისმა, მიტ რომნიმ, ჯეფ მერკლიმ, ჯონ კორნინიმ, კრის მერფიმ, დენ სალივანმა, ანგუს კინგმა, ტოდ იანგმა, შელდონ უაითჰაუსმა და ჯორჯ ჰელმიმ მოითხოვეს, შეუერთდნენ სენატორების "ქართველი ხალხის აქტს", როდესაც სენატი ხელახლა შეიკრიბება ნოემბერში.
"მოხარული ვარ, რომ სენატში ჩემი კოლეგების მნიშვნელოვანმა ნაწილმა მხარი დაუჭირა "ქართველი ხალხის აქტს" და გააცნობიერა, რომ საქართველოში არსებული ვითარების გადადება არ შეიძლება. ერთად ვაგზავნით მკაფიო გზავნილს, რომ არსებობს ჩვენი კანონმდებლობის მტკიცე ორპარტიული მხარდაჭერა. ქართველი ხალხის ევროატლანტიკური მისწრაფებების მიმართ ჩვენი მხარდაჭერა და საქართველოს მიმართ ჩვენი პოზიცია უცვლელი დარჩება, მიუხედავად იმისა, რომელი პარტია გააკონტროლებს ვაშინგტონს", – განაცხადა შაჰინმა.
სენატორმა ჯიმ რიშმა ასევე ხაზი გაუსვა, რომ აღნიშნული კანონპროექტი აგზავნის ძლიერ გზავნილს კონგრესისგან, რომ აშშ ერთიანია ქართველი ხალხის გვერდით, რადგან ისინი ისწრაფვიან ტრანსატლანტიკური საზოგადოებისკენ.
"ვაღიარებთ ქართველი ხალხის სურვილს ევროინტეგრაციასთან დაკავშირებით და მზად ვართ, გავატაროთ აშშ-ის პოლიტიკა, რომელიც მხარს უჭერს მათ შესაძლებლობას მიაღწიონ ამას", - აღნიშნა ჯიმ რიშმა.
