აშშ-ის თავდაცვის მდივანმა ლოიდ ოსტინმა დაადასტურა, რომ ამერიკულ მხარეს აქვს მტკიცებულება ჩრდილოეთ კორეიდან რუსეთში სამხედრო პერსონალის ჩასვლის შესახებ. მანამდე სამხრეთ კორეამ განაცხადა, რომ 12 000 სამხედრო გაუგზავნა ფხენიანმა მოსკოვს.
ასევე სამხრეთ კორეის სადაზვერვო სამსახურებმა გამოაქვეყნეს სატელიტური სურათები, რომლებიც, მათი აზრით, ადასტურებს, რომ ჩრდილოეთ კორეის ჯარები უკვე შეუერთდნენ შორეულ აღმოსავლეთში მდებარე რუსულ ქვედანაყოფებს და შესაძლოა, მალე გაგზავნონ უკრაინის ომში. ამის შესახებ უკრაინის პრეზიდენტმა ვლადიმერ ზელენსკიმაც განაცხადა.
პენტაგონის ხელმძღვანელმა ხაზგასმით აღნიშნა, რომ მას არ აქვს ინფორმაცია იმის შესახებ, თუ რა ამოცანები უნდა შეასრულონ ჩრდილოეთ კორეელმა სამხედროებმა.
"არსებობს მტკიცებულება, რომ ჩრდილოეთ კორეის სამხედრო პერსონალი რუსეთში იმყოფება", - განუცხადა ოსტინმა ჟურნალისტებს რომში ვიზიტის დროს. - კონკრეტულად რას აკეთებენ იქ? ეს ჯერ არ არის ნათელი. ჩვენ უნდა გავარკვიოთ ეს ყველაფერი."
მანამდე ამერიკული გაზეთი Wall Street Journal წერდა, რომ მოსკოვი და ფხენიანი შეთანხმდნენ რუსეთში 1000-მდე ჩრდილოეთ კორეელი სამხედრო მოსამსახურის გაგზავნაზე, რომლებიც რუსეთ-უკრაინის ფრონტზე რეალური ომის გამოცდილებას შეიძენენ.
