საფრანგეთის პრეზიდენტმა, ემანუელ მაკრონმა რუსეთისა და უკრაინის პრეზიდენტებს შორის შეხვედრის პერსპექტივაზე ისაუბრა და თქვა, რომ თუ ეს შეხვედრა შედგება, ეს ნეიტრალურ ქვეყანაში მოხდება. მან ასევე დაამატა, რომ ემხრობა აღნიშნული შეხვედრის ჟენევაში გამართვას.
"მასპინძელი ნეიტრალური ქვეყანა იქნება, შესაძლოა შვეიცარია. მე ვემხრობი ჟენევას, ან თუნდაც სხვა ქვეყანას" – ამბობს მაკრონი.
მანამდე, გერმანიის კანცლერმა, ფრიდრიხ მერცმა თეთრ სახლში ევროპელ ლიდერებთან ერთად გამართული შეხვედრის შემდეგ პრესკონფერენციაზე განაცხადა, რომ რუსეთის პრეზიდენტ ვლადიმირ პუტინსა და უკრაინის პრეზიდენტ ვოლოდიმირ ზელენსკის შორის სამიტი მომდევნო ორი კვირის განმავლობაში შედგება.
გერმანიის კანცლერის თქმით, ტრამპმა პუტინი სამმხრივ შეხვედრაზეც მიიწვია, რათა მოლაპარაკებები "რეალურად დაიწყოს."
მერცის თქმით, ტრამპზე შთაბეჭდილება იქონია ევროპელი ლიდერების საერთო პოზიციამ. მან დაამატა, რომ ახლა ტრამპის ადმინისტრაციასთან გამართული მოლაპარაკებები უკრაინისთვის უსაფრთხოების გარანტიების საკითხს დაეთმობა.
