საქართველოში, ოროზმანის ტერიტორიაზე 1.8 მილიონი წლის წინანდელი ყბის ძვალი აღმოაჩინეს, რომელიც ადრეული ადამიანის სახეობას მიეკუთვნება, რაც უდავოდ მნიშვნელოვანი ფაქტია აფრიკიდან ჩამოსული ადრეული ადამიანების ცხოვრების წესის უკეთ გასაგებად, - წერს ფრაგული 20minutes.
ადამიანის ევოლუციის გასაგებად მნიშვნელოვანი რეგიონი - საქართველოში, დედაქალაქ თბილისიდან დაახლოებით 100 კილომეტრში, ქვემო ქართლის მაშავერას ხეობაში მდებარე ტერიტორია - არქეოლოგებს მრავალი წლის განმავლობაში აოცებდა. მის ნიადაგში აფრიკის გარეთ ჩვენი წინაპრების, ჰომოების, პირველი დადასტურებული კვალია აღმოჩენილი. ილიას სახელმწიფო უნივერსიტეტის მკვლევრებმა განაცხადეს, რომ ცოტა ხნის წინ ოროზმანის პატარა ტერიტორიაზე 1.8 მილიონი წლის წინანდელი ყბის ძვალი აღმოაჩინეს, რომელიც ადრეული ადამიანის სახეობას მიეკუთვნება, - აღნიშნავს „როიტერზე“ დაყრდნობით 20minutes-ი.
„ჩვენ გვჯერა, რომ ოროზმანს შეუძლია კაცობრიობის შესახებ მნიშვნელოვანი ინფორმაციის მოწოდება“, - განაცხადა გიორგი ბიძინაშვილმა, ილიას სახელმწიფო უნივერსიტეტის ქვის ხანის სპეციალისტმა არქეოლოგიის პროფესორმა. ეს ბოლოდროინდელი აღმოჩენა შთამბეჭდავი სერიის ნაწილია. 2022 წელს, იმავე ადგილას ჩატარებული გათხრების შედეგად, ადამიანის კბილი იმავე პერიოდით თარიღდება. მეზობელ სოფელ დმანისში ადამიანის თავის ქალებს 1991 წლიდან ნახულობენ.
ამ ყბის ძვლის იდენტიფიკაცია, რომელიც შესაძლოა Homo erectus-ს ეკუთვნოდეს, გადამწყვეტი მნიშვნელობის იქნება აფრიკიდან გამოსული პირველი ადამიანების ცხოვრების წესის უკეთ გასაგებად. გარდა ამისა, აღმოჩენილია ცხოველთა ნამარხები, მათ შორის ხმალკბილა ვეფხვის, სპილოს, მგლის, ირმის და ჟირაფის, ასევე ქვის იარაღების სამალავი.
„ოროზმანიდან ადამიანის და ცხოველთა ნამარხების შესწავლა საშუალებას მოგვცემს, განვსაზღვროთ ევრაზიის პირველი კოლონიზატორების ცხოვრების წესი“, - თქვა გიორგი ბიძინაშვილმა. უფრო კონკრეტულად, ეს ადგილი მეცნიერებს მიაწვდის ინფორმაციას მათი კვების რაციონის და იმ კლიმატის შესახებ, რომელშიც ისინი ცხოვრობდნენ.
