ვფიქრობ, სალომე ზურაბიშვილის ირგვლივ შექმნილ ფორმატშიც უნდა განვსაზღვროთ გონივრული ვადები, მაგალითად, 31 მარტის სახით, რა დრომდეც მოქალაქეებს ვეტყვით, შედგა თუ არა ერთობის მცდელობა, – ამის შესახებ „ნაციონალური მოძრაობის“ თავმჯდომარე თინა ბოკუჩავამ ჟურნალისტებს განუცხადა.
მისივე თქმით, ყალბი მოლოდინების შექმნა არასწორი და კონტრპროდუქტიულია.
„ერთიანობა ნაციონალური მოძრაობა“ არჩევნებამდეც მხარს უჭერდა ოპოზიციის გაერთიანებას, რადგან ცივილიზაციურ და ქვეყნისთვის ეგზისტენციალურ ბრძოლაში მნიშვნელოვნად მიგვაჩნდა საერთო ფრონტი, თუმცა ჩვენ სხვა პარტიების პოზიციების ფორმირების ფორსირებას ვერ მოვახდენთ. ამიტომ, ყველამ თავისი გადაწყვეტილება უნდა მიიღოს. რა თქმა უნდა, სალომე ზურაბიშვილის ირგვლივ ამგვარი ერთიანობის შექმნას ჩვენ ვემხრობოდით, მიუხედავად იმისა, რომ ყოვლად გაუმართლებელია მისი მხრიდან პრეზიდენტი სააკაშვილის არშეწყალება, თუმცა, აქაც, ჩემი აზრით, უნდა განვსაზღვროთ კონკრეტული ვადები, რის შემდეგაც ცხადი იქნება, რომ ეს ერთობა არ შედგა და ყველა პოლიტიკურმა პარტიამ საკუთარი ძალების ფარგლებში და საკუთარი ფრონტით უნდა გააგრძელოს ბრძოლა ივანიშვილის რეჟიმთან. „ნაციონალური მოძრაობა“ ამას აკეთებდა და აკეთებს მეცამეტე წელია. შესაბამისად, ძალიან კარგად ვიცით და გვესმის, როგორი უნდა იყოს ეს ბრძოლა რუსული რეჟიმის წინააღმდეგ.
მესმის, რომ სამთავრობო პროპაგანდის მცდელობა იქნება ერთმნიშვნელოვნად, ეძიოს განსხვავებები ოპოზიციურ პარტიებში, რათა მოხდეს ოპოზიციური ძალების ფრაგმენტაცია და დაქსაქსვა. რა თქმა უნდა, ოპოზიციის დაქსაქსვა, განსაკუთრებით ურთიერთდაპირისპირება ხელს აძლევს ივანიშვილს. სინამდვილეში, ეს მისი გადარჩენის ერთადერთი შანსია. ამიტომ ამას მე ნამდვილად არასდროს შევუწყობ ხელს. ვფიქრობ, სალომე ზურაბიშვილის ირგვლივ შექმნილ ფორმატშიც უნდა განვსაზღვროთ გონივრული ვადები, მაგალითად, 31 მარტის სახით, რა დრომდეც ჩვენ მოქალაქეებს ვეტყვით, შედგა თუ არა ერთობის მცდელობა, რადგან ყალბი მოლოდინების შექმნაც არასწორი და კონტრპროდუქტიულია ასეთ ვითარებაში“, – განაცხადა თინა ბოკუჩავამ.
