შალვა პაპუაშვილი ოპოზიციაზე: წინა არჩევნებზეც დადეს პირობა, რომ პარლამენტში არ შევიდოდნენ, თუმცა ბოლოს ყველა შევიდა, გვეხვეწნენ, ახალი წლის წინ შეიკრიბა ხაზინადართა საბჭო, რათა მათთვის დაკარგული ხელფასი აღგვედგინა

მისი თქმით, ხელისუფლებას კითხვები მათთან კი აღარ გვაქვს, ვინც გაჰყვირის, „კარვები ჩქარაო“, არამედ მათთან, ვინც ოპოზიციას ქვეყნის გარედან მართავს.

„ეს კიდევ ერთი ფარსია. ისტორია ამჯერად უკვე ფარსად მეორდება. ზუსტად ერთი წლის წინ, იგივე ხალხი შეკრებილი იყო ტელეკომპანია „მთავარის“ სტუდიაში და დაფაზე საჯაროდ დადეს პირობა, რომ პარლამენტში არ შევიდოდნენ, ბოლოს ყველა შევიდა, აღიარეს. მას შემდეგ, რაც ისინი ბოიკოტის შემდეგ შემოვიდნენ პარლამენტში, ხელფასები ჰქონდათ დაქვითული. გვეხვეწნენ და ახალი წლის წინ შეიკრიბა ხაზინადართა საბჭო და ბიურო, რათა მათთვის ის დაკარგული ხელფასი აღგვედგინა, რომელიც პატრიოტული გრძნობებით რომ იყვნენ ბოიკოტში და 2020 წლის „გაყალბებულ“ არჩევნებს არ აღიარებდნენ, ჩამოჭრილი ჰქონდათ. ყველამ მსუყე-მსუყე თანხები ჩაირიცხა საკუთარ ანგარიშზე. ზოგი დასასვენებლად წავიდა, ზოგი - სად; ზოგმა შეიძლება დიდი საახალწლო სუფრა გაშალა. ასეთ ხალხთან გვაქვს საქმე, რომელთაც სინამდვილეში არანაირი ღირებულება არ გააჩნიათ, ამიტომ, პრობლემა მათში კი არაა და კითხვები მათთან კი აღარ გვაქვს, ვინც გაჰყვირის - კარვები ჩქარაო, არამედ კითხვები გვაქვს მათთან, ვინც მათ მართავს ქვეყნის გარეთ. მნიშვნელოვანია დავინახოთ, რა გეგმები, დამოკიდებულება აქვს ქვეყნის გარეთ მყოფ ამ ხალხს. ვნახეთ ლიეტუვის სახელისუფლებო პარტიის წარმომადგენლის, რასა იუკნევიჩიანეს განცხადება. მივედით იმ წერტილზე, რაც დიდი ხანია გულში ჰქონდა ბევრს, ქვეყნის გარეთ, ვინც „ნაცმოძრაობის“ მხარდამჭერია და ამ ადამიანმა ბოლოს თქვა (როგორც ევროპარლამენტმა გაამჟღავნა ბოლოს, რას გვთხოვდნენ სანქციების დაწესებით), გაამჟღავნა, რომ მათი პრობლემაა ქართველი ხალხი, რომელიც „ქართულ ოცნებას“ უჭერს მხარს. არ ვიცი, ქართველ ხალხს რას გვიპირებენ, გადასახლებას, გადაჯიშებას თუ რას, მაგრამ თვითონ ეს დამოკიდებულება ხომ გვაფიქრებინებს, რა ღირებულებებზე დგანან ისინი, ვინც გვეუბნებიან, რომ ევროპა არიან? ეს ხომ ღირებულება დაკარგული ხალხია, რომელიც სხვა ქვეყანაში ხალხს იწუნებს, რადგან მის გემოვნებაში არ ჯდება. სააკაშვილი მათი გემოვნების პოლიტიკოსია და სხვა დანარჩენი, მთლიანად ხალხი, დაიწუნეს. ლიეტუვის სამთავრობო პარტიის წარმომადგენელმა ფაქტობრივად გვითხრა, რომ არ ვვარგივართ და რაღაც უნდა მოგვიხერხონ - გადაგვაშენონ, გადაგვაჯიშონ, გადაგვაცხოვრონ, ჩაგვანაცვლონ სხვა ხალხით, ამიტომ კითხვები ოპოზიციასთან და იმ „ენჯეოებთან“ აღარ გვაქვს, ვინც თავი დაისამარეს - „ისფედმა“, „გამჭვირვალობამ“, საიამ - როგორც თაღლითმა ორგანიზაციებმა. კითხვები გვაქვს მათ პატრონებთან, რა გეგმები აქვთ ქართველ ხალხთან დაკავშირებით. აღგვიქვამენ ერად, ხალხად, ვისაც რაღაც უფლებები გვაქვს თუ მხოლოდ გეოპოლიტიკური ინტერესების ტერიტორიის თვალით გვიყურებენ? ეს მნიშვნელოვანი მომენტია, რათა დავრწმუნდეთ, რა განზრახვები აქვთ არა ოპოზიციას და „ენჯეოებს“, არამედ მათ, ვინც მათ უკან დგანან“,- განაცხადა შალვა პაპუაშვილმა.