იუსტიციის მინისტრმა რატი ბრეგაძემ პრემიერმინისტრის ანგარიშის შესახებ მთავრობის სხდომის დასრულების შემდეგ ისაუბრა:
„ბატონმა პრემიერ-მინისტრმა ვრცლად ისაუბრა პენიტენციურ სისტემაში ჩატარებული რეფორმების შესახებ. ყველას კარგად მოეხსენება, თუ რა მდგომარეობა იყო პენიტენციურ დაწესებულებებში 2011 წელს და ის, რომ წამება და არაადამიანური მოპყრობა გახლდათ სისტემური პრობლემა პენიტენციურ დაწესებულებებში. ეს არის არა ჩვენი შეფასება, არამედ არაერთი ევროპული სტრუქტურის, და, რა თქმა უნდა, ეს ყველაფერი იყო ქვეყნის ძალიან დიდი სირცხვილი. ამის შემდგომ კი, დღეს ჩვენ გვაქვს პენიტენციური სისტემა, რომელშიც მოქმედებს „ციფრული უნივერსიტეტი“ და რომელშიც სულ რამდენიმე ხნის წინ ჩვენ გავხსენით უკვე იუსტიციის სახლები. ეს ყველაფერი, რა თქმა უნდა, 2011 და 2012 წლების პერსპექტივიდან წარმოუდგენელი იყო და, პირდაპირ გეტყვით, ფანტასტიკის სფეროს განეკუთვნებოდა, თუმცა, სისტემის ეფექტიანი მუშაობის შედეგად ეს, ერთი მხრივ წარმოუდგენელი შედეგიც, როგორც ხედავთ, გახდა მიღწევადი და მინდა, ასევე, ყველა ჩემს წინამორბედს და, რა თქმა უნდა, სისტემის ყოველ თანამშრომელს დიდი მადლობა გადავუხადო ამ გაწეული შრომისთვის“, – განაცხადა რატი ბრეგაძემ.
იუსტიციის მინისტრმა ახალი პენიტენციური კოდექსის მიღებაზე გაამახვილა ყურადღება.
„საქართველოს პარლამენტმა უკვე მიიღო პენიტენციური კოდექსი, რომელიც, თავის მხრივ, არის უნიკალური და თანამშრომლობის საკმაოდ კარგი შედეგი. პენიტენციური კოდექსის შემუშავებაში ჩართული იყო როგორც არასამთავრობო ორგანიზაციები, ისე სახალხო დამცველის ოფისი და, რა თქმა უნდა, ჩვენ მაქსიმალურად გავითვალისწინეთ CPT-ის რეკომენდაციებიც. თამამად შეგვიძლია, ვთქვათ, რომ კანონმდებლობა დღეს პენიტენციურ სისტემაში ჩვენ გვაქვს საქართველოს ისტორიის მანძილზე ნამდვილად ერთ-ერთი საუკეთესო, რომელიც უკვე მიიღო საქართველოს პარლამენტმა. ახალი პენიტენციური კოდექსის მიხედვით, იზრდება ბრალდებულთა და მსჯავრდადებულთა უფლებების დაცვის სტანდარტი და, ასევე, რა თქმა უნდა, უმჯობესდება ჩვენი საამაყო თანამშრომლების სოციალური დაცვის გარანტიები. მაგალითისთვის, რაც შეეხება უფლებრივ მდგომარეობას, ბრალდებულს, ასევე, მიენიჭება ხანგრძლივი პაემანის უფლება, რაც მათ არ ჰქონდათ; თანაბრდება ბრალდებულისა და მსჯავრდადებულის პირობები, კერძოდ, ორივესთვის სავალდებულო იქნება, მინიმუმ, 4კვ.მ განსაზღვრა. აქვე უნდა დავაანონსოთ, რომ ხანგრძლივი პაემანები ოჯახის წევრებთან იქნება სრულიად უფასო და სახელმწიფო დაფარავს ამ ხარჯებს, რაც აქამდე იყო ფასიანი; უმაღლესი განათლების უფლება ამიერიდან ექნება ყველა მსჯავრდადებულს; გაიზრდება თანამშრომელთა სოციალური დაცვის გარანტიები და ისინი უკვე მიიღებენ წელთა ნამსახურების და წოდებრივ დანამატებს“, – განაცხადა იუსტიციის მინისტრმა.
