ლისის ტბის ყოფილი მფლობელის, რამაზ ახვლედიანის განცხადებით, მიხეილ სააკაშვილმა მამუკა ხაზარაძის, ბადრი ჯაფარიძისა და ჰოლანდიელი ბობ მეიერის მიერ შექმნილ შპს „ლისი ლეიქ დეველოპმენტს“ პირდაპირი მიყიდვის წესით გადასცა მისთვის ჩამორთმეული ქონება, გამარტივებული პირობებით და ბინათმშენებლობის უფლებით.
მისივე თქმით, მამუკა ხაზარაძემ შემდგომ ლიცენზიაც მოსთხოვა.
„ჩემთვის ყველზე შოკისმომგვრელი იყო, რომ 2010 წელს მიხეილ სააკაშვილმა მამუკა ხაზარაძის, ბადრი ჯაფარიძის და ჰოლანდიელი ბობ მეიერის მიერ შექმნილ შპს „ლისი ლეიქ დეველოპმენტს“ პირდაპირი მიყიდვის წესით გადასცა ჩემთვის ჩამორთმეული ქონებაც და ის, რაც იყო ლისის ტბაზე განკარგული, მაგრამ ბევრად უკეთესი პირობებით. იქ არც ლისის ტბის გადარჩენაზე იყო და მის ეკოლოგიურ მდგომარეობაზე ვალდებულება, ასევე საბაგირო გვქონდა ჩვენ ვალდებულებაში, ნუცუბიძის პლატოდან ამოდიოდა ზემოთ და ესეც მოუხსნა. ანუ, ძალიან გამარტივდა მათთვის შემდგომი ბიზნესი. გარდა ამისა, სატყეო ტერიტორიებზე მხოლოდ და მხოლოდ შეიძლებოდა, კანონი იყო ასეთი, განვითარებულიყო სარეკრეაციო მიზნით, როგორც ხედავთ, მიეცა მაშინ უფლება, რომ ბინათმშენებლობისთვის გამოეყენებინა და რასაც წარმატებით ახორციელებს, ღმერთმა ხელი მოუმართოს, ეს მისი საკითხებია, უბრალოდ, მე გამაღიზიანა ერთმა რამ, რომ 2012 წელს, როცა უკვე ეს ქონებაც გადაეცა, როცა ეს დაპირებებიც აღარ იყო საჭირო, მისი წარმომადგენელი დამიკავშირდა და მითხრა, რომ ლიცენზია, ტბაზე რომელიც მქონდა და გარემოს დაცვის ნებართვა, გადამეცა იმ კომპანიისთვის, რომელიც მათ შექმნეს და ის გააგრძელებდა შემდგომში მუშაობას. გამიკვირდა და ვუთხარი, მამუკა, რაც მქონდა, ყველაფერი წამართვეს, დამრჩა ერთი ეს ლიცენზია, რომლითაც აქ შემიძლია ვისარგებლო, ვითანამშრომლო და შემდგომ განვითარებაზე ვიფიქრო. გაეცინა და მითხრა, არაუშავსო, ჩვენებთან დაილაპარაკეო და ნახეო. ამ დალაპარაკება დალაპარაკებაში უკვე მეილიც კი მომივიდა შემდგომში, რომ ყველაფერი შეთანხმებული გვაქვს და გთხოვთ, წარადგინოთ თქვენი დოკუმენტაცია გარემოს დაცვის სამინისტროში, რომ შემდგომში გადაეცეს სხვა კომპანიას“, – განაცხადა რამაზ ახვლედიანმა „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის“ სხდომაზე.
რამაზ ახვლედიანის განმარტებით, ხაზარაძე მისი პარტნიორი გახდა 2005 წლის იანვრიდან და მისთვის არანაირი თანხა არ გადაუხდია.
„მან შეაფასებინა ჩემ მიერ სახელმწიფოსგან გამოსყიდული ქონება აუდიტს, მითხრა, ეს არის მილიონი დოლარი, ამიტომ მე შემოვიტან 2 მილიონ დოლარს, ამით დაფუძნდება სააქციო საზოგადოება, რასაც დავეთანხმე. მამუკა გახდა სამეთვალყურეო საბჭოს თავმჯდომარე, ბადრი ჯაფარიძე იყო სარევიზიო კომისიის თავმჯდომარე, მე ვიყავი სამეთვალყურეო საბჭოს თავმჯდომარის მოადგილე. 2005 წლიდან ვიყავით პარტნიორები, გვაქვს სააქციო საზოგადოება. ჩემთვის არანაირი თანხა არ გადაუხდია ბატონ მამუკას“, – აღნიშნა რამაზ ახვლედიანმა.
რამაზ ახვლედიანი ამბობს, რომ ქონება 2006 წელს ჩამოართვეს და, როგორც პარტნიორი, მამუკა ხაზარაძე ყველა საკითხთან დაკავშირებით საქმის კურსში ჰყავდა ჩაყენებული.
„პირველად რომ დამირეკეს, ვიდრე ფინანსურში შევიდოდი, ჯერ მამუკასთან შევედი კაბინეტში და ჩავაყენე საქმის კურსში, რომ მიბარებენ ფინანსურ პოლიციაში და შენ რომ იცოდე. მიდი, გარკვიე და რომ მოხვალ, მითხარიო. ამის შემდგე, ყოველი ჩემი დაბარების შემდეგ, მე ვნახულობდი მამუკას, სახლშიც ვიყავი მისული, როცა გვიან, საღამოს გამოვიდოდი, ოფისში მის კაბინეტშიც მქონდა შეხვედრა. მას ჰქონდა საშუალებები, სულ მცირე, იმაში გარკვეულიყო, რა შეიცვალა ასე უცებ“, – განაცხადა რამაზ ახვლედიანმა საგამოძიებო კომისიის სხდომაზე.
