"ოფიციალურად მე არ ვარ უფლებამოსილი, ლიეტუვაში ვიზიტით ჩამოვსულიყავი, მაგრამ ვმოქმედებ რწმენით და მიმაჩნია, რომ ეს უნდა გამეკეთებინა". - ამის შესახებ საქართველოს პრეზიდენტმა, სალომე ზურაბიშვილმა ლიეტუვის საზოგადოებრივ მაუწყებლისთვის მიცემულ ინტერვიუში განაცხადა.
სალომე ზურაბიშვილს კითხვა დაუსვეს, იყო თუ არა მისი ვიზიტი მთავრობასთან შეთანხმებული.
„თქვენ ალბათ იცოდით, რომ – არა, ეს ვიზიტი არ იყო საქართველოს მთავრობის მიერ დადასტურებული ჩემი გაგების მიღმა არსებული მიზეზებით. ვფიქრობ, ახლა ყველამ, პარლამენტმა, მთავრობამ, პრეზიდენტმა, უნდა ვიმუშაოთ ერთობლივად და გავაკეთოთ ყველაფერი, რაც შესაძლებელია, როგორც ამას ჩვენი კონსტიტუცია მოითხოვს, რათა დავარწმუნოთ პარტნიორები, რომ აუცილებელია, კანდიდატის სტატუსი მიმდინარე წელს მივიღოთ. ვცდილობ, ეს ყველაფერი გავაკეთო. ჩემთვის ძალიან სამწუხაროა, თუმცა ოფიციალურად მე არ ვარ უფლებამოსილი, ეს ვიზიტი შემესრულებინა, მაგრამ ვმოქმედებ რწმენით და მიმაჩნია, რომ ეს უნდა გამეკეთებინა. მიმაჩნია, რომ საქართველოს ხალხმა მომანიჭა მანდატი და შესაბამისად ვმოქმედებ“, – განაცხადა ზურაბიშვილმა.
პრეზიდენტს პარლამენტში იმპიჩმენტის პროცედურის დაწყების შესახებაც ჰკითხეს.
„არ შემიძლია ამის ახსნა. ეს შეუძლია მხოლოდ მათ, ვინც ეს დაიწყო. იმპიჩმენტის პროცედურა ხშირად იწყება ძალიან მძიმე დანაშაულისთვის – სახელმწიფო ღალატისთვის ან მსგავსისთვის. ამ შემთხვევაში, არ ვიცი სხვა ქვეყანა, რომელიც იმპიჩმენტის პროცედურას დაიწყებდა იმის გამო, რომ პრეზიდენტი თავის საქმეს ასრულებს და ცდილობს, ქვეყანა იმ გზაზე დააყენოს, რომელზეც ის უნდა იყო, კერძოდ კი – ევროინტეგრაციის გზაზე. საქართველო თანმიმდევრულად მუშაობდა ამ საკითხზე დამოუკიდებლობის მოპოვების მომენტიდან. ეს ჩვენი მთავარი მიზანი და ამოცანაა, ეს არის საქართველოს მოსახლეობის იმედი, ამას მხარს უჭერს ჩვენი ქვეყნის მოსახლეობის 80%-ზე მეტი. ამას ადასტურებს საზოგადოებრივი აზრის ყველა გამოკითხვა, რომელიც ბოლო 30 წლის განმავლობაში ჩატარებულა“, -აღნიშნა საქართველოს პრეზიდენტმა.
