სამწუხაროდ, არის წითელი ხაზები, რომლებიც არ უნდა გადავკვეთოთ და კამპანია ღირსეულად უნდა ვაწარმოოთ, ისე, რომ, პარტია „ნაციონალური მოძრაობის“ თავმჯდომარეობის არჩევნების დასრულების შემდეგ ჩვენ არ შეგვრცხვეს, ერთმანეთს თვალებში შევხედოთ, – ამის შესახებ „ერთიანი ნაციონალური მოძრაობის“ თავმჯდომარეობის კანდიდატმა, ნონა მამულაშვილმა განაცხადა.
„მინდა, კოლეგებმა ბევრად უფრო მნიშვნელოვან საკითხებზე ისაუბრონ. პირველ რიგში, ისაუბრონ სააკაშვილის სიცოცხლის გადარჩენაზე და, რა თქმა უნდა, პარტიის გაჯანსაღებაზე და არა პოლარიზაციის გაღრმავებაზე, რადგან პარტია არ უნდა დაიშალოს. ასეთი რიტორიკა თუ გაგრძელდება, პარტია ძალიან დიდი რისკის წინაშე დადგება. პარტიას არ აქვს ფუფუნება, რომ ის ნებისმიერმა წევრმა დატოვოს, რადგან ჩვენ ყოველთვის ვიყავით ევროპულ ღირებულებაზე ორიენტირებული პარტია და ასე უნდა გაგრძელდეს. ვფიქრობ, მე შევძლებ, ვიყო ის ადამიანი, რომელიც გააერთიანებს ყველა მხარეს, რომელიც შეძლებს, პარტიის გაძლიერებისთვის გამოიყენოს ყველა კანდიდატის ძლიერი მხარე, დაამყაროს პარტიაში მეტი დისციპლინა, გააჯანსაღოს შიდა სტრუქტურა, გამართოს მენეჯმენტი, დაამყაროს დასავლეთთან ბევრად მჭიდრო კომუნიკაცია და „ქართული ოცნება“ დავამარცხოთ 2024 წლის არჩევნებში ძლიერი „ნაციონალური მოძრაობის“ ხელმძღვანელობით“, – განაცხადა ნონა მამულაშვილმა.
