პირველად ხდება, რომ ეროვნული მასშტაბით, ამომრჩეველთა 90 პროცენტს ექნება შესაძლებლობა, არჩევნებში ტექნოლოგიური საშუალებების გამოყენებით მიიღოს მონაწილეობა, – ამის შესახებ ცესკო-ს თავმჯდომარემ, გიორგი კალანდარიშვილმა საქართველოს პირველი არხის გადაცემაში „ყველა შეკითხვა ცესკო-ს“ განაცხადა.
„ერთი მხრივ, ეს არის ამომრჩეველთა რეგისტრაციის, იგივე ვერიფიკაციის, იდენტიფიკაციის აპარატების გამოყენება, როდესაც ამომრჩეველი ელექტრონული ID ბარათის, ან პასპორტის გამოყენებით მიიღებს მონაწილეობას არჩევნებში და დადასტურდება მისი მონაწილეობა შესაბამისი აპარატის გამოყენებით. მეორე მხრივ, საუბარია ხმის მთვლელი, ე.წ ოპტიკური სკანერების ტიპის აპარატების გამოყენებაზე, რომელიც უზრუნველყოფს შედეგების დაჩქარებულად დათვლას, სიზუსტეს მონაცემებთან მიმართებაში, ადამიანური ფაქტორით გამოწვეული შეცდომების მინიმუმამდე დაყვანას. ტექნოლოგიურ ინტერვენციაზე როცა ვსაუბრობთ, არ უნდა დაგვავიწყდეს მესამე კომპონენტი. ეს არის პლანშეტების გამოყენება, როგორც ტრადიციულ, ასევე მოდერნიზებულ საარჩევნო უბნებზე, რომელთა მეშვეობითაც პირდაპირ საარჩევნო უბნებზე განხორციელდება შედეგების, წინასწარი მონაცემების, თუ შემდგომ საბოლოო მონაცემების უშუალოდ მატერიალური სახით შედგენილი შემაჯამებელი ოქმების ცესკო-ში გადაგზავნა, რაც მნიშვნელოვნად დააჩქარებს წინასწარი მონაცემების გამოქვეყნებას თითქმის მთელი ქვეყნის მასშტაბით. ჩვენი პროგნოზით, ეს ყველაფერი განხორციელდება საღამოს ცხრა საათიდან 22:00 საათამდე მონაკვეთში“, – განაცხადა კალანდარიშვილმა.
ყველა შეკითხვა ცესკო-ს - რა გამოცდილება აქვს ცესკო-ს ელექტრონული არჩევნების ჩასატარებლად #LIVE
მსგავსი: ყველა შეკითხვა ცესკო-ს - რა გამოცდილება აქვს ცესკო-ს ელექტრონული არჩევნების ჩასატარებლად #LIVE
კალანდარიშვილის თქმით, 2024 წლის საპარლამენტო არჩევნები პირველი არჩევნებია, რომელიც ევროკავშირის კანდიდატის სტატუსის ქოლგის ქვეშ ჩატარდება, რაც თავის მხრივ, ნიშნავს, რომ მნიშვნელოვანია, პრაქტიკაში იყოს გათვალისწინებული და დანერგილი შესაბამისი სტანდარტები და შესაბამისი საერთაშორისო პრაქტიკა.
გადაცემის წამყვანის შეკითხვაზე, „რამდენად აქვთ მზაობა ცესკო-ს თანამშრომლებს, რადგან ამ ხარვეზზე ხშირად ხდება აპელირება“, გიორგი კალანდარიშვილმა განაცხადა, რომ ეს საკითხი ხშირად ხდება მანიპულაციების საგანი, ფაქტები, რიცხვები და სტატისტიკა კი სულ სხვას ამბობს.
„განვლილმა პილოტებმა ბევრი რამ დაგვანახა პრაქტიკაში და ბევრი საკითხი გავითვალისწინეთ, მათ შორის ადგილობრივი და საერთაშორისო ორგანიზაციების რეკომენდაციები. ესეც გარკვეულწილად, მზადების ნაწილია და ამან მიგვიყვანა იქამდე, სადამდეც მივედით და რა სერვისსაც 26 ოქტომბერს საზოგადოებას შევთავაზებთ“, – განაცხადა კალანდარიშვილმა.
ამასთან, გიორგი კალანდარიშვილმა აღნიშნა, რომ სიახლე რა სიკეთის მომტანიც არ უნდა იყოს, ყველაფერი ფუჭი იქნება, თუ საზოგადოება არ არის ინფორმირებული.
„ჩვენი ერთ-ერთი სტრატეგიული პრიორიტეტი შესაბამის დოკუმენტში გახდა საარჩევნო კულტურის განვითარება, რომლის მთავარ აქტივობას და ამოცანას წარმოადგენს ამომრჩეველთა ინფორმირება, ცნობიერების ამაღლება და საგანმანათლებლო კამპანიების განხორციელება. ამ მიზნით, შევისწავლეთ საერთაშორისო პრაქტიკა და თუ სადმე ტექნოლოგიები დანერგილა და გაკეთებულა რამე აქტივობა, რომელიც საინფორმაციო მიზნებს ემსახურებოდა, ფაქტობრივად, ყველაფრის ინკორპორირება მოვახდინეთ ჩვენ პრაქტიკაში. მეტსაც გეტყვით, უპრეცედენტო მასშტაბის საინფორმაციო კამპანიები განვახორციელეთ ჯერ კიდევ წელიწად-ნახევრით ადრე“, – განაცხადა კალანდარიშვილმა.
გიორგი კალანდარიშვილმა საზოგადოებრივ მაუწყებელს პროექტისთვის „ყველა შეკითხვა ცესკო-ს“, მთელი ცესკო-ს ადმინისტრაციის სახელით, მადლობა გადაუხადა და აღნიშნა, რომ „არჩევნები საერთო საქმეა, მედიის როლი მნიშვნელოვანია და ასეთი ტიპის პროექტი უმნიშვნელოვანესია, რათა მოხდეს წინასაარჩევნო გარემოს დაცვა არასწორი ინფორმაციების გავლენისა და არასწორი აღქმების ჩამოყალიბებისგან, რომელიც ზოგადად, არჩევნების პროცესს თან სდევს ხოლმე“.
