"ბრძოლის ავანგარდში მოუწია ყოფნა "ხალხის ძალას". ჩვენთვის ეს რეალობა განსაკუთრებით რთული იყო. იმაზე რთული, ვიდრე 2012 წელი," - ამის შესახებ "ხალხის ძალის" ერთ-ერთი ლიდერი დიმიტრი ხუნდაძე სოციალურ ქსელში წერს.
"ვულოცავ მთელ საქართველოს ევროკავშირის კანდიდატის სტატუსის ღირსეულად მიღებას. უკრაინას მშვიდობაში მოახმაროს მოლაპარაკებების გახსნა. წარმატებებს ვუსურვებ მოლდაველ ხალხს.
მსურს მადლობა გადავუხადო ევროკავშირის ლიდერებს გონივრული პოლიტიკური გადაწყვეტილებისთვის.
მადლობა საზოგადოებას მოთმინებისთვის, გონიერებისთვის და გამძლეობისთვის.
მმართველმა გუნდმა ურთულესი გზა გაიარა ამ წარმატების მისაღწევად. იბრძოდა რეკომენდაციების შესასრულებლად, ომისა და რევოლუციის თავიდან ასაცილებლად და მოლოტოვის კოქტეილების ჩასაქრობად. ოპოზიციას კი ერთი მიზანი ჰქონდა - ევროკავშირის პერსპექტივა ჩავარდნილიყო, არჩევნებში სასპეკულაციოდ გამოეყენებინა და ხელისუფლება ხელში ჩაეგდო, საზოგადიებას კი ცალ ფეხზე დგომას ურჩევდა.
ბრძოლის ავანგარდში მოუწია ყოფნა "ხალხის ძალას". ჩვენთვის ეს რეალობა განსაკუთრებით რთული იყო. იმაზე რთული, ვიდრე 2012 წელი. "ცალ ფეხზე დგომის" სურვილი, რომელიც ოპოზიციის სიმბოლოდ იქცა, ჩვენ გამოვააშკარავეთ და ქვეყნის ორ ფეხზე დგომისთვის უდიდესი შრომა ჩავდეთ. ჩვენ არ ვითხოვდით, ჩვენ დამსახურებულად მოვითხოვდით კანდიდატის სტატუსის მონიჭებას და მივიღეთ კიდეც.
სწორედ ამიტომ, ევროკავშირის გაფართოების გზაზე, დღეს საქართველოს ყველაზე ღირსეულად ეკავა ადგილი. თუმცა, ვიყოთ ბოლომდე გულწრფელნი - რომ არა ბიძინა ივანიშვილის პოლიტიკაში შემოსვლა 2012 წელს, ქვეყანა დღეს ცალ ფეხზეც ვერ იდგებოდა. ამიტომ დღევანდელი დღისთვის მთავარი მადლობა მას!," - წერს ხუნდაძე.
