დიდ ბრიტანეთში დამნაშავე პირები თავს თავისუფლად გრძნობენ, გადაადგილდებიან, იგივე ქვეყნის ხელისუფლებამ ქართველი მოსამართლეები გონივრული ეჭვის საფუძველზე დაასანქცირა, რაც აბსურდია, – ამის შესახებ პარლამენტის საპროცედურო საკითხთა კომიტეტის თავმჯდომარემ, დავით მათიკაშვილმა განაცხადა.
მისი თქმით, დიდ ბრიტანეთს პრეტენზია აქვს, დემოკრატიის ნათელი მაგალითი იყოს და როცა ამ ყველაფერს მრუდე გზით ახორციელებს, ეს კითხვებზე მეტს აჩენს.
„რატომ ხდება ეს ყველაფერი? კარგად გვახსოვს, საქართველოსგან, სასამართლოსგან რას ითხოვდნენ – ვეტინგს, ფაქტიურად, სასამართლოს დამორჩილებას. ის, რაც აღმოსავლეთ ევროპის ცალკეულ ქვეყნებში მოხდა. „დიფ სთეითმა“ შეძლო და ხელისუფლება, რომელიც არ აწყობდათ, მისი დემონტაჟი იგივე სასამართლოს ხელით მარტივად მოახდინა. ამ მოთხოვნას საქართველო რომ დათანხმებოდა და ზეწოლას დამორჩილებოდა, არანაირ კორუფციულ გარიგებებსა და ეჭვებზე საუბარი აღარ იქნებოდა. ეჭვები მყისიერად გაეფანტებოდათ, თუ „დიფ სთეითს“ საშუალება ექნებოდა, არჩევნების შედეგები ისე შეეცვალა, როგორც სურდათ და ის ძალები მოეყვანათ, რომელიც ვინც ქართველ ხალხს არ უნდა, მაგრამ მათ უნდა, ვინც საქართველოში აგენტურას მართავს. არ შეიძლება, სამართლებრივი პროცესი მტკიცებულების გარეშე იყოს. დიდ ბრიტანეთს პრეტენზია აქვს, დემოკრატიის ნათელი მაგალითი იყოს და როცა ამ ყველაფერს მრუდე გზით ახორციელებს, ეს კითხვებზე მეტს აჩენს“, – განაცხადა დავით მათიკაშვილმა.
