უკრაინის პრეზიდენტის, ვოლოდიმირ ზელენსკის განცხადებით, უკრაინულმა დაზვერვამ მოიპოვა შიდა რუსული დოკუმენტები, რომლებიც ადასტურებს, რომ კრემლი საპარლამენტო არჩევნების დასრულებისთანავე ახალ მასშტაბურ მობილიზაციას ამზადებს. ამის შესახებ უკრაინის ლიდერმა მორიგი ვიდეომიმართვისას განაცხადა.
ზელენსკის პროგნოზით, პუტინი გეგმავს, რომ არჩევნების იმიტაციის შემდეგ, წლის ბოლომდე რამდენიმე ასეული ათასი რუსეთის მოქალაქე სწრაფად გაიწვიოს, ხოლო მომავალ წელს კიდევ ერთი იმდენივე მობილიზაცია განახორციელოს. ეს პროცესი საკონტრაქტო სამხედრო სამსახურში აყვანის პარალელურად წარიმართება.
პრეზიდენტის თქმით, პუტინის გეგმა მარტივია — მანამდე ვიზუალურად უნდა შეიქმნას შთაბეჭდილება, თითქოს მოსახლეობა ომს მხარს უჭერს (ვინაიდან არჩევნებზე დაშვებული პარტიები რეალურად მშვიდობის წინააღმდეგნი არიან), რის შემდეგაც ხელმძღვანელობა მოსახლეობის ფართომასშტაბიან იძულებით გაწვევაზე გადავა.
კიევი უკვე ამზადებს საპასუხო აქტიურ მოქმედებებს, რათა მაქსიმალურად გაურთულოს რუსეთს ახალი ძალების მობილიზება. ზელენსკიმ პარტნიორებს, განსაკუთრებით აშშ-ს, მოუწოდა, გააძლიერონ უკრაინის საჰაერო თავდაცვა (ПВО) და ზეწოლა მოახდინონ მოსკოვზე, რომ აქცენტი ომის გაგრძელებაზე კი არა, მის დასრულებაზე გაკეთდეს.
"მოხსენება მივიღე დაზვერვის მთავარი სამმართველოს უფროსისგან რუსული მობილიზაციის მომზადების შესახებ. ყველაფერი შიდა რუსული დოკუმენტებით დასტურდება — ისინი ამას შემოდგომისთვის, საპარლამენტო არჩევნების იმიტაციისთანავე ამზადებენ... პუტინის გეგმა განსაკუთრებით რთული არ არის: მას სურს შექმნას ილუზია, თითქოს რუსები ომს უჭერენ მხარს", — განაცხადა ვოლოდიმირ ზელენსკიმ.
