როგორც The Wall Street Journal (WSJ) იტყობინება, აშშ-ის არმიის მინისტრმა დენ დრისკოლმა პრეზიდენტ დონალდ ტრამპს გადადგომის შესახებ განცხადებით მიმართა. ეს გადაწყვეტილება გახდა რამდენიმეთვიანი დაძაბულობისა და მწვავე უთანხმოების კულმინაცია, რომელიც მასა და თავდაცვის მინისტრ პიტ ჰეგსეტს შორის არსებობდა.
WSJ-ის ცნობით, მხარეებს შორის კონფლიქტი გამოიწვია არმიის განვითარების სტრატეგიულმა ხედვამ და პენტაგონში მიმდინარე საკადრო წმენდებმა. პიტ ჰეგსეტმა არაერთი მაღალი რანგის გენერალი და ოფიციალურად დამტკიცებული ლიდერი გაათავისუფლა თანამდებობიდან, რასაც დენ დრისკოლი ღიად უპირისპირდებოდა. განსაკუთრებით დაძაბა ვითარება არმიის შტაბის უფროსის, გენერალ რენდი ჯორჯის თანამდებობიდან მოხსნამ, რომელთანაც დრისკოლს მჭიდრო სამუშაო და მეგობრული ურთიერთობა ჰქონდა.
გამოცემის ინფორმაციით, დრისკოლის წასვლა (რომელიც პენტაგონს უახლოეს დღეებში დატოვებს) აშშ-ის არმიას სენატის მიერ დამტკიცებული უმაღლესი სამოქალაქო და სამხედრო ლიდერების გარეშე ტოვებს, რადგან შტაბის უფროსის პოსტზეც ამჟამად მხოლოდ მოვალეობის შემსრულებელი გენერალია.
მიუხედავად უთანხმოებისა, თეთრი სახლის პრესსამსახურმა WSJ-ისთვის მიცემულ კომენტარში დადებითად შეაფასა დრისკოლის საქმიანობა. ადმინისტრაციამ ხაზი გაუსვა მის როლს არმიის საბრძოლო მზადყოფნის ამაღლებასა და უკრაინასა და რუსეთს შორის მიმდინარე მოლაპარაკებების პროცესის ხელშეწყობაში.
