უკრაინის პრეზიდენტმა, ვოლოდიმირ ზელენსკიმ თეირანი უკრაინის წინააღმდეგ მიმდინარე ომში პირდაპირ აგრესორად მოიხსენია და განაცხადა, რომ რუსეთისთვის სამხედრო დახმარების გაწევით ირანი კონფლიქტის უშუალო მონაწილე გახდა.
"ირანი უკრაინას უკვე დაესხა თავს, როდესაც რუსეთს 'შაჰედის' ტიპის დრონები და სხვა შეიარაღება მიაწოდა. ეს არ არის უბრალოდ სამხედრო ტექნიკის ტრანსფერი, ეს არის შეგნებული მონაწილეობა ჩვენი ქალაქების, ინფრასტრუქტურისა და მშვიდობიანი მოსახლეობის წინააღმდეგ მიმართულ ტერორში. ისინი თანაბრად იზიარებენ პასუხისმგებლობას ყოველ იმ სიცოცხლეზე, რომელიც მათი იარაღით შეწყდა," — განაცხადა ვოლოდიმირ ზელენსკიმ.
პრეზიდენტის ეს განცხადება კიდევ ერთხელ უსვამს ხაზს კიევის პოზიციას იმასთან დაკავშირებით, რომ მოსკოვისა და თეირანის სამხედრო თანამშრომლობა გლობალური უსაფრთხოების საფრთხეს წარმოადგენს. მიუხედავად იმისა, რომ ირანი ოფიციალურად ხშირად უარყოფს შეიარაღების სისტემატურ მიწოდებას, უკრაინის შეიარაღებული ძალები ყოველდღიურად აფიქსირებენ და ანადგურებენ რუსეთის მიერ გაშვებულ ირანულ უპილოტო საფრენ აპარატებს, რომლებიც სამოქალაქო და ენერგეტიკული ობიექტებისკენ არის მიმართული.
