პოლონეთის პრემიერ-მინისტრმა დონალდ ტუსკმა კრაკოვის ცენტრში მომხდარ სროლას, რომელსაც რამდენიმე ადამიანი ემსხვერპლა, ტერორისტული აქტი უწოდა. ამის შესახებ პრესკონფერენციაზე განაცხადა.
პოლონეთის შინაგან საქმეთა სამინისტროს უახლესი მონაცემებით, სროლის შედეგად, რომელიც დამნაშავემ იმავე დღეს უფრო ადრე, კრაკოვის ისტორიულ ნაწილში მდებარე ბაზრის მოედანზე ავტომობილიდან გამვლელების მიმართულებით გახსნა, ექვსი ადამიანი დაიღუპა, ხოლო 15 დაშავდა. დაღუპულთა შორისაა დიდი ბრიტანეთის, სულ მცირე, ერთი მოქალაქე და სამი პოლონელი.
უწყების ცნობით, სროლის შედეგად დაშავდნენ გერმანიის, ავსტრიის, პორტუგალიის, დიდი ბრიტანეთისა და რუსეთის მოქალაქეები. დაჭრილი რუსი ქალის შესახებ ინფორმაციას პოლონეთში რუსეთის საელჩოც ადასტურებს.
თავად მსროლელი დაკავებისას დაიჭრა და მოგვიანებით მძიმე მდგომარეობაში საავადმყოფოში გადაიყვანეს. ეჭვმიტანილის ავტომობილში იარაღი და საბრძოლო მასალა აღმოაჩინეს.
ტუსკის თქმით, სავარაუდო მსროლელის სახლში ასევე იპოვეს ორი ქალისა და ერთი მამაკაცის ცხედარი. სავარაუდოდ, საუბარია ეჭვმიტანილის უახლოეს ნათესავებზე.
პოლონეთის პრემიერმა ასევე ხაზი გაუსვა, რომ პოლიცია და ქვეყნის სპეცსამსახურები ყველაფერს გააკეთებენ, რათა დანაშაულის დეტალები და მსროლელის მოტივების შესახებ ინფორმაცია რაც შეიძლება მალე გასაჯაროვდეს.
