კანადის პრემიერ-მინისტრმა, მარკ კარნიმ აშშ-ის ტარიფების წინააღმდეგ საპასუხო ზომები დააანონსა და დონალდ ტრამპის გადაწყვეტილება გლობალური ვაჭრობისთვის „ტრაგედიად“ შეაფასა.
მარკ კარნის განცხადებით, კანადა დააწესებს 25%-იან ტარიფს ყველა იმ ავტომობილზე, რომელიც შეერთებული შტატებიდან შემოდის და არ შეესაბამება კანადა-აშშ-მექსიკის სავაჭრო შეთანხმებას.
ჟურნალისტებთან საუბრისას კანადის პრემიერ-მინისტრმა ასევე აღნიშნა, რომ ახალი ტარიფები არ გავრცელდება ავტონაწილებზე და არ შეეხება მექსიკიდან შემოტანილ ავტომობილებს.
„კანადა უპასუხებს აშშ-ის მიერ ავტომობილებზე დაწესებულ ტარიფებს იმავე მიდგომით, 25%-იანი ტარიფებით ყველა ავტომობილზე, რომელიც იმპორტირებულია შეერთებული შტატებიდან“, – განაცხადა კარნიმ.
როგორც მარკ კარნიმ განმარტა, კანადის მიერ ადრე გამოცხადებული ტარიფები ძალაში დარჩება.
„აშშ-ის ადმინისტრაციის მხრიდან გუშინდელი ქმედებები, მიუხედავად იმისა, რომ კონკრეტულად არ არის მიმართული კანადის წინააღმდეგ, დაარღვევს გლობალურ ეკონომიკას და უარყოფითად იმოქმედებს გლობალურ ეკონომიკურ ზრდაზე“, – აღნიშნა კარნიმ.
ცნობისთვის, აშშ-ის პრეზიდენტის, დონალდ ტრამპის მიერ სხვადასხვა ქვეყნისთვის დაწესებული ტარიფები 10%-იდან 49%-მდეა. ამასთან, ტრამპმა ევროკავშირს – 20%-იანი, დიდ ბრიტანეთს კი 10%-იანი ტარიფები დაუწესა. როგორც აშშ-ის პრეზიდენტმა აღნიშნა, ტარიფები აშშ-ს ეკონომიკის აღდგენაში დაეხმარება. ასევე, ტრამპმა 25%-იანი ტარიფი დააწესა უცხოური წარმოების ყველა ავტომობილზე.
თარგმანი: პირველი არხი
