ბოლსონარუ ბრაზილიის არჩევნებში მარცხის შემდეგ მაიამიში ჩაფრინდა

AP-ის ცნობით, თვითმფრინავი ბოლსონარუსა და მისი ოჯახის წევრებით მაიამის მახლობლად, ოპა-ლოკას სპეციალურ აეროპორტში დაეშვა. რამდენიმე საათით ადრე კერძო ლაინერი, რომელიც არგენტინიდან გამოფრინდა, ეკვადორის ქალაქ გუაიაკილში დაეშვა და რამდენიმე წუთში აშშ-ისკენ გაემართა.

აშშ-ის პრეზიდენტმა დონალდ ტრამპმა მანამდე განაცხადა, რომ მხარს დაუჭერდა ქვეყანაში ბოლსონარუს ჩასვლას. მისი აზრით, ბრაზილიაში არჩევნები "ნამდვილად უცნაური" და "საშინელი" იყო. ბრაზილიის ხელახლა არჩეულმა პრეზიდენტმა ლუის ინასიუ ლულა და სილვამ კი თავისი ოპონენტის გამგზავრებას "სამარცხვინო" უწოდა.

რამდენიმე საათით ადრე არგენტინის საიმიგრაციო უწყებებმა განაცხადეს, რომ ფლავიუ ბოლსონარუ, მისი მეუღლე ფერნანდა, ასევე ქალიშვილები კაროლინა და ლუიზა ქვეყანაში ბრაზილიის საზღვარზე, საერთაშორისო სასაზღვრო პუნქტის გავლით შევიდნენ. "მათ წარადგინეს ნამდვილი სამგზავრო დოკუმენტები და არ ჰქონდათ არანაირი იურიდიული დაბრკოლება ქვეყანაში შესასვლელად", - აღნიშნულია განცხადებაში.

ამასთან, 26 ოქტომბერს ბოლსონარუს აეკრძალა ქვეყნის დატოვება და გადაეცა უზენაესი სასამართლოს დადგენილება ჩვეულებრივი და დიპლომატიური პასპორტების ჩაბარების შესახებ, კორუფციის, ფულის გათეთრებისა და გადასახადებისგან თავის არიდების საქმეებზე მიმდინარე გამოძიებასთან დაკავშირებით. ეს მოხდა მაშინ, როდესაც პოლიტიკოსი შინაპატიმრობაში მყოფ 71 წლის მამას, ჟაირ ბოლსონარუს ინახულებდა, რომელსაც 2022 წლის საპრეზიდენტო არჩევნებში მარცხის შემდეგ სახელმწიფო გადატრიალების მცდელობისთვის 27 წლით თავისუფლების აღკვეთა მიუსაჯეს. მას განაჩენი მაშინ გამოუცხადეს, როდესაც პოლიტიკოსი აშშ-დან დაბრუნდა, სადაც ის არჩევნების შემდეგ სამი თვით იყო წასული.

შეასრულა თუ არა უმცროსმა ბოლსონარუმ პასპორტების ჩაბარების ბრძანება, უცნობია, თუმცა, მედიის ცნობით, მას ასევე აქვს იტალიის მოქალაქეობა.

ფლავიუ ბოლსონარუ უარყოფს ბრალდებებს ფულის გათეთრების, კორუფციისა და საარჩევნო კამპანიის მიმდინარეობაზე უკანონო ზეგავლენის საქმეებზე, რომლებსაც ქვეყნის უზენაესი სასამართლო იძიებს.

25 ოქტომბერს ბოლსონარუმ არჩევნების მეორე ტური მოქმედ პრეზიდენტ ლულა და სილვასთან წააგო, მან ხმათა 48,21% მიიღო მისი მეტოქის 51,79%-ის წინააღმდეგ. ბოლსონარუმ განაცხადა, რომ არ ცნობს კენჭისყრის შედეგებს და სავარაუდო გაყალბებაზე მიუთითა. თუმცა, 26 ოქტომბერს მისმა "ლიბერალურმა პარტიამ" მარცხი აღიარა.