რუსეთის მიერ ომის დაწყების შემდეგ, უკრაინაში, სულ მცირე, 258 989 რუსი სამხედრო დაიღუპა. ეს ირკვევა განახლებული სიიდან, რომელიც BBC-ის რუსულმა სამსახურმა გამოცემა "მედიაზონასთან" და მოხალისეთა გუნდთან ერთად ღია წყაროების მონაცემებზე დაყრდნობით გამოაქვეყნა.
დადასტურებულია რუსეთის არმიისა და სხვა ძალოვანი სტრუქტურების თითქმის 7,7 ათასი ოფიცრის დაღუპვა.
კერძოდ, ცნობილია 17 გენერლის გარდაცვალების შესახებ: ხუთი გენერალ-ლეიტენანტი, ცხრა გენერალ-მაიორი, ორი თადარიგის გენერალი და ერთი რუსეთში გაქცეული უკრაინის უსაფრთხოების სამსახურის (სბუ) გენერალი.
მონაცემებს 20,5 ათასი მობილიზებულის დაღუპვის შესახებ ავტორები სერიოზულად შემცირებულად მიიჩნევენ. დაღუპული სამხედროების საშუალო ასაკი 37,8 წელია.
ჟურნალისტებისა და მოხალისეების მიერ შედგენილი სია სრული არ არის, რადგან სამხედრო მოსამსახურეების დაღუპვის შესახებ მთელი ინფორმაცია არ არის საჯაროდ ხელმისაწვდომი.
"მედიაზონასა" და BBC-ის რუსული სამსახურის ჟურნალისტები, 2022 წლის თებერვალში უკრაინაში რუსეთის სრულმასშტაბიანი შეჭრის პირველივე დღიდან, აწარმოებენ მედიაში, სოციალურ ქსელებსა და ხელისუფლების ორგანოების ვებგვერდებზე გამოქვეყნებული ცნობების აღრიცხვას რუსი სამხედროების დაღუპვის შესახებ.
NATO-ს შეფასებით, ფრონტზე ყოველთვიურად 40 000-ზე მეტი რუსი ჯარისკაცი იღუპება ან მძიმედ შავდება.
