28,46% - ერევნელ ამომრჩეველთა სრული აპათია ერევნის მერის არჩევნების მიმართ

ცენტრალური საარჩევნო კომისიის თავმჯდომარის მიერ ბრიფინგზე გაკეთებული განცხადების თანახმად, ადგილობრივი დროით 20:00 საათზე, ანუ უბნების დახურვის დროისთვის არჩევნებში 824 250-იდან 234 553-მა ამომრჩეველმა მიიღო მონაწილეობა, რაც ხმის უფლების მქონე ამომრჩევლების 28,46%-ია. 

ამგვარად, დაფიქსირდა ამომრჩეველთა რეკორდულად დაბალი აქტივობა, მსგავსი სურათი სომხეთის დედაქალაქში არასდროს დაფიქსირებულა.

სომხური პრესა აღნიშნავს, რომ  დედაქალაქის არჩევნებზე, რომელიც გაიმართა 2018 წლის 23 სექტემბერს, „ხავერდოვანი რევოლუციის“ ეიფორიის ფონზე, საბოლოო აქტივობამ 43,65% შეადგინა (370 324 ამომრჩეველი 848 343-იდან), 2017 წლის 14 მაისს, ანუ „ხავერდოვანი რევოლუციამდე“ კი დედაქალაქის წარმომადგენლობითი ორგანოს არჩევნებზე აქტივობამ 40,99% (345226 ამომრჩეველი) შეადგინა.

ბიულეტენების 2,28%-ის დამუშავების შემდეგ (475 უბნიდან 14-იდან) 1773 ხმით ლიდერობს მმართველი პარტია „სამოქალაქო ხელშეკრულება". მეორე ადგილზე  1026 ხმით  არის ჰაიკ მარუთიანის „ეროვნული პროგრესი“,  მესამეზე ბლოკი „დედა სომხეთი“ 727 ხმით. შემდეგ მოდიან  „რესპუბლიკა" (590) და „საზოგადოების  ხმა" (541).