გაფორმდა ნასყიდობის ხელშეკრულება ჩემს კომპანია „მაგნატს“ და ახლად შექმნილ კომპანია "ენესკას" ნავთობპროდუქტების სადისტრიბუციო კომპანიას შორის. თავიდანვე აქციონერებად 25 პროცენი იყო „თიბისი“, - ამის შესახებ „შპს „მაგნატის“ მესაკუთრემ, ბიზნესმენმა ჯემალ ლეონიძემ, პარლამენტის დროებითი საგამოძიებო კომისიის სხდომაზე განაცხადა, სადაც ბიზნესზე ზეწოლის ერთ-ერთ საქმეს განიხილავენ.
როგორც ლეონიძემ აღნიშნა, „ვითიბი ბანკსა“ და „რესპუბლიკა ბანკში“ თავიდანვე აფრთხილებდნენ, რომ „თიბისი ბანკის“ ნდობა არ შეიძლებოდა და სესხსაც სთავაზობდნენ „თიბისის“ თანხის გადასაფარად. ბიზნესმენის განცხადებით, დააკავეს მას შემდეგ, როცა 52 ავტოგასამართი სადგურიდან და 4 ნავთობბაზიდან სწორედ ბოლო ქონების გადაცემას მოაწერა ხელი ნოტარიუსთან.
„ყველა მაფრთხილებდა, შემიძლია დავასახელო გვარები: "ვითიბი ბანკში" კაცია, "ბანკი რესპუბლიკაში" ალავიძე, რომ მაგათი ნდობა არ შეიძლება, ჩვენ ვერ ვენდობით და მოდი, ისე გავაკეთოთ, რომ სესხს მოგცემთ. აი, "რესპუბლიკა ბანკი" მეუბნებოდა, რომ მოგცემ "თიბისი" ბანკის გადასაფარ თანხას, ოღონდ მაგათ დაანებე თავი. შეყოფილი მქონდა თავი და ვერაფერს ვიზამდი. ზედმეტი დამაჯერებლობისა თუ გარანტიისათვის, გავაკეთეთ ისე, რომ ამ ახალ კომპანიაში აქციები ამათ სახელზე გავაფორმეთ, ანუ ჩემი იყო, მაგრამ 10% იყო რესპუბლიკა ბანკზე, 10% ვითიბი ბანკზე, იყო სამხარაძეზე, კიდევ ერთ კრედიტორზე და დამრჩა ამ კომპანიაში 25% - ისიც ჩემს ახლობელზე მქონდა გაფორმებული. არ არის მგონი დანაშაული არც ახლა, არც მაშინ. ბოლო ქონების გადაცემას მოვაწერე ხელი, ამ 52 ავტოგასამართი სადგურიდან და 4 ნავთობბაზიდან, ერთი ყველაზე დიდი ობიექტი იყო თბილისში, წყალსადენის ქუჩაზე, ლეონიძის ბაზას ეძახდნენ მაშინ, "მაგნატის" ნავთობბაზა, დღეს "გალფი" აწერია - მთელი ქალაქი, მთელი ქვეყანა იქ მიდიოდა ფასისა და ხარისხის გამო. ამ ქონების გადაცემაზე რომ მოვაწერე ხელი ნოტარიუსთან, იმ დღეს დამაკავეს.“ - აღნიშნა ჯემალ ლეონიძემ.
შეგახსენებთ, დღეს, პარლამენტში შექმნილი „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი“ დროებითი საგამოძიებო კომისიის მეოთხე სხდომა მიმდინარეობს.
სხდომის დღის წესრიგის მთავარი საკითხია ბიზნესზე ზემოქმედების ერთ-ერთი საქმის განხილვა, რომელიც შპს „მაგნატსა“ და მის მფლობელს, ჯემალ ლეონიძეს უკავშირდება.
როგორც ლეონიძის ჩვენებიდან ირკვევა, საქმის მთავარ მოქმედ პირთა შორის არიან „თიბისი ბანკის“ მფლობელები, ახლა უკვე პარტია „ლელოს“ ლიდერები მამუკა ხაზარაძე და ბადრი ჯაფარიძე.
მამუკა ხაზარაძემ დაბარებული იყო კომისიის სხდომაზე, თუმცა "ფეისბუკში" დაწერა - დღეს არალეგიტიმური პარლამენტში მისვლას და ამ ცირკში მონაწილეობას, რა თქმა უნდა არ ვაპირებ!
