დიდთოვლობამ და პერიოდულმა წვიმამ მეწყრული პროცესები გაააქტიურა მთიან აჭარაში. რამდენიმე ლოკაციაზე მეწყერი ჩამოწვა.
ხულოში, სოფელ თაგოში ზვავის შედეგად ჩაიკეტა სასოფლო გზა. სასოფლო გზა ასევე ჩაკეტილია ამავე მუნიციპალიტეტის სოფელ ჩაოში.
„უხვმა ნალექმა რამდენიმე ლოკაციაზე მეწყრული პროცესები გამოიწვია. ჩატარებული სამუშაოების შედეგად, განხორციელდა დამეწყრილი საავტომობილო გზების გაწმენდა. ასევე, ზვავის შედეგად, ჩაიკეტა სოფელ თაგოს გზა. მცირე მეწყრული პროცესი განვითარდა სოფელ ჩაოს გზაზეც, გაწმენდითი სამუშაოები დილიდან დაიწყება“, – ნათქვამია ხულოს მერიის მიერ გავრცელებულ ინფორმაციაში.
ასევე, ხულოში რამდენიმე საცხოვრებელ სახლს ქარმა სახურავი გადახადა.
„ზარალს მუნიციპალიტეტის მერიის შესაბამისი კომისია შეისწავლის და ოჯახებს გაეწევათ შესაბამისი დახმარება“, – აცხადებენ მერიაში.
საღამოს მეწყერი ჩამოწვა ბათუმი-ახალციხის ცენტრალური გზის მერისის მონაკვეთზე, სადაც, საგზაო დეპარტამენტის ინფორმაციით, გაწმენდითი სამუშაოები ახლაც მიმდინარეობს.
