დღეს ბათუმში სტარტი აიღო რეგატამ ,,ბათუმის ღია პირველობა აფროსნობაში 2025", რომელიც 8 ივნისამდე გაგრძელდება.
სამი დღის განმავლობაში, ერთმანეთს შეეჯიბრებიან საქართველოში მოქმედი ყველა საიალქნო კლუბების წარმომადგენლები. რეგატაში მონაწილეობას იღებენ თბილისის საიალქნო კლუბის, საქართველოს საიალქნო კლუბის, ფოთისა და ბათუმის აფროსანთა კლუბების სპორტსმენები ლაზერის და ოპტიმისტის კლასში.
„აფროსნობა საქართველოში ძალიან განვითარებული სპორტის სახეობა იყო და ეს განსაკუთრებულად იგრძნობოდა ბათუმში. რაღაც პერიოდი იყო ჩავარდნები, მაგრამ ბოლო წლებია ახალი გუნდის ძალისხმევით ვატარებთ შეჯიბრებებს საქართველოს მასშტაბით. პირველად ტარდება ბოლო წლების განმავლობაში საქართველოს ყველა კლუბს შორის პირველობა ბათუმში, მაგრამ იმედი გვაქვს რომ ბათუმში უფრო ხშირად ჩავატარებთ შეჯიბრებს. ბათუმს აქვს ძალიან დიდი პოტენციალი, ყველა თვალსაზრისით-ბათუმში არიან კარგი სპეციალისტები, ბათუმში არიან კარგი სპორტსმენები და ტრადიციები. ამიტომაც, ჩვენი მიზანია, სპორტის ეს სახეობა ბათუმში, რაც შეიძლება მეტად განვითარდეს“,-ამბობს, საქართველოს აფროსანთა ფედერაციის დამფუძნებელი, ჯუმბერ ცომაია.
ღონისძიების ორგანიზატორია საქართველოს აფროსნობის ფედერაცია, მათი განცხადებით ტურნირი ტრადიციული გახდება და მომავალში უფრო მასშტაბურ ხასიათს მიიღებს.
