პენიტენციურ დაწესებულებაში შესვლა და მონახულება არ გახლავთ დეპუტატის უფლება, ეს გახლავთ პარლამენტის თავმჯდომარის უფლება, რომლის დელეგირებაც მას შეუძლია პარლამენტის წევრზე. სამწუხაროდ, პარლამენტის წევრები ამ უფლებით გადაჭარბებულად სარგებლობენ. რაც სცდება ხოლმე იმ ზღვარს, რომელიც განსაზღვრულია უფლებებთან დაკავშირებით ან სხვა მხრივ ინტერესთან მონახულების, – ამის შესახებ პარლამენტის თავმჯდომარე შალვა პაპუაშვილმა პარლამენტის პლენარულ სხდომაზე ოპოზიციონერი დეპუტატების საპასუხოდ განაცხადა, რომელთაც პრეტენზია გამოთქვეს, რომ არ მიეცათ საპატიმროში ლაზარე გრიგორიადისის მონახულების საშუალება.
შალვა პაპუაშვილის განმარტებით, კონკრეტულ შემთხვევაში დაკავებულ პირთან მიმართებით, დამატებითი უფლებრივი საჭიროება ჩარევისა და მონახულების არ არსებობს, მისვე თქმით, არსებობს საკითხის პოლიტიზების საფრთხე.
„იცით, რომ სახალხო დამცველის წარმომადგენელმა მოინახულა ეს კონკრეტული ბრალდებული პირი, მისი ადვოკატი შეუფერხებლად შედის. ყველაფერი საჯაროა და არ მგონია, არსებობს დამატებითი უფლებრივი მხრივ ჩარევის და მონახულების საჭიროება. მეორეს მხრივ, კი ვხედავ საფრთხეს მოხდეს ამ საკითხის პოლიტიზება და თქვენ გამოსვლას სწორედ ეს შინაარსი აქვს. გინდათ, აქ პოლიტიკური ასპექტი ჩადოთ. ეს არის სწორედ საფრთხე, მათ შორის, მართლმსაჯულებისთვის. რაც შეეხება თავად საკითხს, ბრალდება წარდგენილია და ამის მიხედვით იმსჯელებს თავად სასამართლო“, – განაცხადა შალვა პაპუაშვილმა.
