სააკაშვილის შეწყალების შესაძლებლობა მორალური გადაწყვეტილებაა, რომელსაც ჩემით მივიღებ, შეუძლებელია ამაზე გავლენის მოახდენა საგარეო ან შიდა ზეწოლით, - ამის შესახებ საქართველოს პრეზიდენტმა სალომე ზურაბიშვილმა Chatham House-ში ყოფილ პრეზიდენტ მიხეილ სააკაშვილთან დაკავშირებულ კითხვაზე პასუხისას განაცხადა და აღნიშნა, რომ სააკაშვილი ალექსეი ნავალნი არ არის.
"თავისუფალი და სამართლიანი არჩევნები არ არის დამოკიდებული იმაზე, თუ სად იქნება [მიხეილ] სააკაშვილი. ის არ არის პოლიტიკური ოპონენტი ციხეში, პირდაპირ რომ გიპასუხოთ, ის არ არის [ალექსეი] ნავალნი. ის არის ყოფილი პრეზიდენტი, რომლის პრეზიდენტობის პერიოდში ბევრი ისეთი რამ მოხდა, არ ვიცი რა დავარქვა ამას... ვგულისხმობ, რასაც ახლა ვხედავთ და რასაც სხვადასხვა რეჟიმის, ავტორიტარული რეჟიმების დროს ვხედავდით, ადამიანის უფლებების დარღვევებს ციხეებში, ამას ყველაფერს ვხედავდით და ამაში გვიცხოვრია სააკაშვილის მმართველობის დროს.
ასე, რომ ის რეალური მიზეზებით არის ციხეში, თუმცა ეს არ ნიშნავს იმას, რომ უნდა უარვყოთ და არ უნდა დავიცვათ, ან არ უნდა ვცეთ პატივი ჰუმანიტარულ პერსპექტივას. ჩვენ ვაკვირდებით რა ხდება ციხეში...".
სალომე ზურაბიშვილმა არ უპასუხა კითხვას მიხეილ სააკაშვილის შეწყალების შესაძლებლობაზე და ამბობს, რომ ეს იქნება "მორალური გადაწყვეტილება", რაზეც ვერავინ მოახდენს გავლენას, ვერც ქვეყნის შიგნით და ვერც მის მიღმა.
"რეპუტაციულად, უმჯობესი იქნებოდა, [მიხეილ სააკაშვილი] სადმე სხვაგან ყოფილიყო. ეს მთავრობის გადაწყვეტილებაა. სხვადასხვა გზა არსებობს იმისა, როგორ შეიძლება ამ საკითხის გადაწყვეტა. სხვა ქვეყნები მიმართავენ ხოლმე შინაპატიმრობას, ასევე არსებობს ექსტრადიცია, უკრაინამ გამოიჩინა მზაობა.
ჩემი მხრივ, ერთი შესაძლებლობა მაქვს, რაზეც არასდროს ვაკეთებ კომენტარს ქვეყნის გარეთ და რთულად ვპასუხობ ამ კითხვას ქვეყნის შიგნით. ბევრი სხვა ადამიანი ელოდება შეწყალებას და ახსნას თუ დაიწყებ, არასამართლიანი იქნება მათ მიმართ. ასე რომ, კომენტარს არ გავაკეთებ. ეს მორალური გადაწყვეტილებაა, რომელსაც ჩემით მივიღებ და მხოლოდ მე ვიქნები პასუხისმგებელი. ეს ნამდვილად არ არის ის, რაზეც გარე ან შიდა ზეწოლა იმოქმედებს".
საქართველოს მესამე პრეზიდენტი 2021 წლის 1 ოქტომბრის შემდეგ პატიმრობაშია. მას სასამართლომ პატიმრობა დეპუტატ ვალერი გელაშვილის ცემისა და სანდრო გირგვლიანის გარდაცვალების საქმეზე მსჯავრდადებულთა შეწყალების გამო მიუსაჯა. მიხეილ სააკაშვილის წინააღმდეგ კიდევ სამი საქმეა აღძრული.
2022 წლის 12 მაისიდან სააკაშვილი კლინიკა „ვივამედში“ გადის მკურნალობის კურსს. ოჯახის წევრები, ადვოკატები და მისი მხარდამჭერები, ასევე სამედიცინო დარგის სპეციალისტები, მათ შორის უცხოელი ექსპერტები აცხადებენ, რომ სიცოცხლის შესანარჩუნებლად მიხეილ სააკაშვილი დაუყოვნებლივ უნდა იქნას გადაყვანილი საზღვარგარეთ სამკურნალოდ.
ადვოკატებმა ჯანმრთელობის მდგომარეობის გათვალისწინებით მიხეილ სააკაშვილისთვის სასჯელის გადავადების ან მისი სასჯელისგან გათავისუფლების მოთხოვნით თბილისის საქალაქო და სააპელაციო სასამართლოებს მიმართეს - მოთხოვნა არ დაკმაყოფილდა. ამის შემდეგ სააკაშვილის უფლებადამცველებმა მიმართეს სტრასბურგის ადამიანის უფლებათა სასამართლოს და მოითხოვეს დაუყოვნებელ ზომად გამოყენებულიყო მისი საზღვარგარეთ გადაყვანა. სასამართლო საქმის განხილვას განაგრძობს, თუმცა ეს ნაწილი არ დააკმაყოფილა".
