სალომე ზურაბიშვილს იმგვარი ლეგიტიმაცია აღარ აქვს, როგორც ზოგადად აქვთ პრეზიდენტებს, საბედნიეროდ, ეს გვშველის გარკვეულ საკითხებში, – ამის შესახებ ჟურნალისტებს ფრაქცია „ქართული ოცნების“ თავმჯდომარემ, მამუკა მდინარაძემ განუცხადა.
სალომე ზურაბიშვილის ჩეხეთში ვიზიტის შეფასებისას, მამუკა მდინარაძემ განმარტა, რომ სალომე ზურაბიშვილი კონსტიტუციის დარღვევას აგრძელებს.
„რასაც ახლა ის აკეთებს, თავისი სახელი უკვე დაერქვა. ეს არის კონსტიტუციის დარღვევა. საქართველოს ეგრეთ წოდებულმა პრეზიდენტმა, კონსტიტუციის მთავარი გარანტი რომ უნდა ყოფილიყო, უკაცრავად და, თავზე გადაიხია საქართველოს კონსტიტუცია ისე, რომ არც დაფიქრდა და მას შემდეგ, რაც საქართველოს საკონსტიტუციო სასამართლომ დაადგინა, რომ მისი ეს ქმედება არის საქართველოს კონსტიტუციის დარღვევა, აგრძელებს იმავეს, მაგრამ მთავარია, რომ ამის შესახებ ჩვენი მხრიდან მყარად იყო დაფიქსირებული, სახელი დავარქვით და, შესაბამისად, მას იმგვარი ლეგიტიმაცია, როგორც ზოგადად აქვთ პრეზიდენტებს, აღარ აქვს. საბედნიეროდ, ეს გვშველის გარკვეულ საკითხებში“, – განაცხადა მამუკა მდინარაძემ.
